საგარეო საქმეთა მინისტრმა მიხეილ ჯანელიძემ მონაწილეობა მიიღო დონორთა ყოველწლიურ საკოორდინაციო ფორუმში „საერთაშორისო თანამშრომლობა განვითარებისთვის“.
საგარეო უწყების ხელმძღვანელმა ფორუმის მონაწილეებს სიტყვით მიმართა. მიხეილ ჯანელიაძემ ისაუბრა გაეროს ათასწლეულის განვითარების მიზნებისა და 2015 წლის შემდგომი მდგრადი განვითარების დღის წესრიგის ამოქმედების მნიშვნელობაზე.
„ჩვენ გვაქვს აღებული ვალდებულებები და შესაბამისად მიზანმიმართულად უნდა შევასრულოთ 2030 წლის დღის წესრიგის ამოცანები, უზრუნველვყოთ მათი მაქსიმალური საზოგადოებრივი მხარდაჭერა და მოსახლეობის ჩართულობა.“ – განაცხადა საგარეო საქმეთა მინისტრმა.
საგარეო უწყების ხელმძღვანელმა აღნიშნა, რომ საგარეო საქმეთა სამინისტრო განუხრელად მუშაობს, რათა მოახდინოს საქართველოს მთავრობის მიერ პრიორიტეტული მიმართულებებით განხორციელებული პროექტების, რეფორმებისა და ინსტიტუტების გაძლიერების პოზიტიური გამოცდილების საერთაშორისო ასპარეზზე წარმოჩენის უზრუნველყოფა, რაც მიზნად ისახავს საქართველოს თანამშრომლობის გაღრმავებას საერთაშორისო ორგანიზაციებთან და მეგობარ ქვეყნებთან.
მიხეილ ჯანელიძემ გამოსვლაში მადლობა გადაუხადა გაერო-ს განვითარების პროგრამას, მოსახლეობის ფონდსა და ბავშვთა ფონდს, მათ მიერ საქართველოში, მათ შორის ოკუპირებული აფხაზეთის რეგიონში განხორციელებული პროექტებისთვის, რაც უაღრესად მნიშვნელოვანია ოკუპირებულ ტერიტორიაზე შეზღუდული ჰუმანიტარული საქმიანობის გათვალისწინებით. საგარეო საქმეთა მინისტრმა ასევე მადლობა გადაუხადა გაეროს ლტოლვილთა უმაღლესი კომისარიატის ოფისს, მისი ძალისხმევისთვის იძულებით გადაადგილებულ პირთა დასახმარებლად.
„დონორების პოლიტიკურმა მხარდაჭერამ და გაწეულმა ფინანსურ-ეკონომიკურმა დახმარებამ მნიშვნელოვანი როლი შეასრულა საქართველოს სახელმწიფოებრივი ფორმირების პროცესში, მათ შორის საქართველოს ეკონომიკური განვითარებისა და ქვეყნის ინსტიტუციონალური შესაძლებლობების გაძლიერების თვალსაზრისით. დონორების მხარდაჭერა მნიშვნელოვნად უწყობს ხელს ჩვენი ქვეყნის დიდ ევროპულ ოჯახში დაბრუნებას, სადაც ადამიანის თავისუფლება, მისი უფლებები და კანონის უზენაესობა მთავარ ღირებულებებს წარმოადგენს.“ – განაცხადა მიხეილ ჯანელიძემ.
აღნიშნულ ღონისძიებაში მონაწილეობა მიიღო ყველა დონორი ქვეყნის და საერთაშორისო ორგანიზაციის წარმომადგენელმა საქართველოში. ფორუმის ფარგლებში, საქართველოს პრემიერ მინისტრმა, გიორგი კვირიკაშვილმა, საქართველოს მთავრობასთან ერთად, საერთაშორისო პარტნიორებს წარუდგინა ინფორმაცია სოციალურ და ეკონომიკურ სფეროებში გატარებული რეფორმების შემდგომი განვითარების გეგმების შესახებ.
