ყოველ შაბათს, თბილისის ოპერისა და ბალეტის თეატრში ორენოვანი და თემატური ხასიათის ტურები გაიმართება.
კულტურის სამინისტროს პრესსამსახურის ცნობით, ყოველ ხუთშაბათს კი თეატრი სკოლის მოსწავლეებს უმასპინძლებს. აღნიშნულთან დაკავშირებით, დღეს თეატრში სამხატვრო ხელმძღვანელი დავით კინწურაშვილი და საბალეტო დასის სამხატვრო ხელმძღვანელი ნინო ანანიაშვილი პრესკონფერენციას გამართავენ, რომელსაც ასევე კულტურისა და ძეგლთა დაცვის მინისტრი მიხეილ გიორგაძე, საქართველოს განათლებისა და მეცნიერების მინისტრი თამარ სანიკიძე, ტურიზმის დეპარტამენტის ხელმძღვანელი გიორგი ჩოგოვაძე და ოპერის ადმინისტრაციის წარმომადგენლები დაესწრებიან.
სამინისტროს ინფორმაციით, მომდევნო კვირიდან თეატრის გიდი დაინტერესებულ პირთა ჯგუფს დაათვალიერებინებს ოპერის უნიკალურ შენობას. ექსკურსიასთან ერთად კი გააცნობს თეატრის შიდა სამზარეულოს.
სტუმრებს საშუალება ექნებათ დაათვალიერონ კულისები, საგრიმიოროები, საორკესტრო ორმო, დაესწრონ მიმდინარე რეპეტიციებს.
აღსანიშნავია, რომ პირველი ტური ოპერის თეატრში 2 აპრილს მოეწყობა, როგორც ქართულ, ისე ინგლისურ ენაზე. თეატრის სპეციალური შეთავაზებით ისარგებლებენ ასევე ოჯახები და პენსიონერები. 6 წლამდე ბავშვებისთვის ტური უფასოა.
კლასიკურის გარდა, თეატრში თემატური ტურებიც მოეწყობა. კერძოდ, ბალეტომანებს “პუანტების”, ოპერის მოყვარულებს “პრიმადონას”, ორკესტრითა და დირიჟორით დაინტერესებულებს კი “უვერტიურისა” და “მაესტროს” ტურის არჩევა შეეძლებათ.
