ლიტერატურული პრემია “საბას” ფინალისტების ვინაობა უკვე ცნობილია! კონკურსის პირველი ეტაპი დასრულდა და “საბას” ჟიურიმ დაასახელა ფინალისტები – ე.წ. შორთლისტები, სადაც პრემიაზე წარდგენილი 265 წიგნიდან მხოლოდ 60 მოხვდა. ამით “საბას” წინასაკონკურსო ციებ-ცხელება მთავარ ფაზაში გადავიდა, ვინაიდან სექტემბერში სწორედ ამ 60 ფინალისტიდან დასახელდება გამარჯვებულები – ისინი, ვინც საქართველოში ყველაზე ავტორიტეტული ლიტერატურული ჯილდოს და, მასთან ერთად, “თიბისი ბანკის” მიერ დაწესებული ფულადი პრემიების მფლობელები გახდებიან.
ყოველწლიური ლიტერატურული პრემია “საბა” 2003 წელს დააფუძნა “თიბისი ბანკმა”, პენ-ცენტრმა და რუსთავი-2-მა.
პრემიის მიზანია წლის საუკეთესო წიგნების გამოვლენა. ჟიურის მიერ პრემიაზე განიხილება საქართველოში წინა წელს გამოცემული ყველა ორიგინალური ნაწარმოები, უცხოური ნაწარმოების ქართული თარგმანი და, ასევე, ქართული ნაწარმოების უცხოური თარგმანები. ცალკე გაიცემა პრემია “ლიტერატურის განვითარებაში შეტანილი განსაკუთრებული წვლილისათვის”.
22.07.13
