საქართველოს განათლებისა და მეცნიერების სამინისტროსათვის ერთ-ერთ პრიორიტეტს ინკლუზიური პროფესიული განათლება წარმოადგენს. სამინისტროს მიზანია ნებისმიერ პირს შეუქმნას ხელმისაწვდომი საგანმანათლებლო სივრცე და საზოგადოებაში დაამკვიდროს ადექვატური ღირებულებები სპეციალური საგანმანთლებლო საჭიროების მქონე და შეზღუდული შესაძლებლობების მქონე პირების მიმართ.
ინკლუზიური პროფესიული განათლების პოპულარიზაციის მიზნით, სამინისტროსა და ორგანიზაცია ,,ბაბალეს“ ინიციატივით, სახელწოდებით ,,მე და პროფესიები,, მოდების ჩვენება გაიმართა, რომელშიც მონაწილეობა სპეციალური საგანმანათლებლო საჭიროებისა და შეზღუდული შესაძლებლობების მქონე მოზარდებმა, პროფესიული კოლეჯების სტუდენტებმა და მათმა მეგობრებმა მიიღეს. მათ ცნობილი ქართველი დიზაინერების მიერ შექმნილი სხვადასხვა პროფესიის სამოსი მოირგეს და შეკრებილ აუდიტორიას წარუდგნენ.
ღონისძიების ,,მე და პროფესიები,, მთავარ გზავნილს წარმოადგენდა პროფესიული განათლების პოპულარიზაცია და იმის ხაზგასმა, რომ ნებისმიერი პროფესია ნებისმიერი ადამიანისთვის ხელმისაწვდომია. პროექტი ,, მე და პროფესიები,, ინოვაციურია, რადგან სრულიად განსხვავებული სფეროს, ინტერესების, შესაძლებლობების ადამიანები გააერთიანა.
იდეის ხორცშესხმაში ჩართულნი იყვნენ ცნობილი დიზაინერები: სალომე ღვინიაშვილი, ავთანდილი, ლალო კარდიგანი, აკა ნანიტაშვილი, ანუკი არეშიძე, მაკა ხარძიანი და სხვ. სამოსის შეკერვაში აქტიური მონაწილოება მიიღო პროფესიულმა კოლეჯებმა: გლდანის პროფესიული მომზადების ცენტრი და ,, მერმისი,,. ფოტო და ვიდეოგადაღებას ახორციელებდნენ პროფესიული სასწავლებლების სტუდენტები და კურსდამთავრებულები;
მთავარი მოქმედ გმირებს კი პროფესიული სასწავლებლების სტუდენტები, მათ შორის სპეციალური საგანმანათლებლო საჭიროებისა და შეზღუდული შესაძლრებლობების მქონე სტუდენტები და სკოლის მოსწავლეები წარმოადგენდნენ. ღონისძიების ორგანიზებაზე იმუშავა ასევე კომპანია „ფეშენ შარმმა“. ჩვენების მხატვრული მხარის უზრუნველყოფაში კი ჩართული იყო ჩრდილების თეატრი.
,,მე და პროფესიების,, ორგანიზების პროცესში დაცული იქნა მრავალფეროვნებისა და ინკლუზიურობის პრინციპი, რაც კარგ პრეცენდენტს ქმნის საზოგადოებაში ადექვატური განწყობებისა და დამოკიდებულებების შექმნაში. ჩვენების მომზადებაში ჩართულმა თითოეულმა ინდივიდმა მიიღო რაღაც ახალი, გაუზიარა სხვას ისეთი გამოცდილება, რომელიც აქამდე უცნობი იყო მისთვის.
