საქართველოს თავდაცვის მინისტრი „შეიარაღებული ძალების მობილიზაციისა და რეზერვის კონცეფციის პროექტის“ გაცნობის მიზნით სტუდენტებთან შეხვედრებს მართავს. თინათინ ხიდაშელი პირველად საქართველოს ეროვნულ უნივერსიტეტს (SEU) ესტუმრა და სტუდენტებს პროექტის დეტალები პირადად გააცნო. მინისტრმა სტუდენტებთან სამხედრო სამსახურში გაწვევის სისტემასა და მის მოდერნიზაციაზეც ისაუბრა.
„დღეს დავიწყეთ სტუდენტებთან რეზერვის კონცეფციის განხილვა. მთავარი ამოცანა რამდენიმე ძირითადი მიმართულებით შეგვიძლია ჩამოვაყალიბოთ. ნებისმიერი ტიპის რეზერვი, მობილიზაცია, გაწვევა, ანუ ნებისმიერი ქმედება, რომელიც ჯარის და საზოგადოების მჭიდრო თანამშრომლობას, ერთობლივ მოქმედებას გულისხმობს, აუცილებად საზოგადოებრივი კონსენსუსი შედეგი უნდა იყოს. ჩვენ ვცდილობთ, ეს კონსენსუსი ვიპოვოთ საჯარო განხილვებით. ორი კვირა მთლიანად ახალგაზრდობას დაეთმობა, შემდეგ დავიწყებთ დამსაქმებლებთან შეხვედრებს. უნდა ვისაუბროთ ფორმებზე, რომელზეც უფრო მარტივი იქნება თანამონაწილეობა. კონცეფციით ჩვენ ვსაუბრობთ სამ ძირითად მიმართულებაზე – არმიის რეზერვზე, პროფესიულ რეზერვსა და ტერიტორიულ რეზერვზე. ნატოს ექსპერტებთან გავგზავნეთ კონცეფციის პირველი ვერსია, საჯარო შეხვედრების დროს ჩამოყალიბებული შუალედური ვერსიაც და მიმდინარე შეხვედრების შედეგად კორექტირებულ ვერსიასაც გავაცნობთ მათ უსაფრთხოების კონფერენციაზე, რომელიც 24-25 მაისს თბილისში გაიმართება. ამ დროისთვის უკვე გვექნება დასრულებული და შეჯერებული ვარიანტი და ივნისში ვგეგმავთ პარლამენტში წარვადგინოთ და გამოვაქვეყნოთ“,- განაცხადა თინათინ ხიდაშელმა.
თავდაცვის მინისტრმა პრეზენტაციის წარდგენის შემდეგ სტუდენტების შეკითხვებს უპასუხა. ახალგაზრდები რეზერვისთვის საჭირო ფინანსების, პროექტში საზოგადოების აქტიურად ჩართვისა და რეზერვის მომზადების სპეციფიკით დაინტერესდნენ, შეკითხვები დასვეს ტერიტორიული მთლიანობის, ტერორიზმთან ბრძოლისა და საერთაშორისო სამშვიდობო მისიებში ქართველი სამხედროების მონაწილეობის თემებზეც.
ეფექტიანი და ხელმისაწვდომი მობილიზაციისა და რეზერვის სისტემა ეროვნული თავდაცვის სისტემის სრულყოფილად ფუნქციონირებისთვის მეტად მნიშვნელოვანია. „შეიარაღებული ძალების მობილიზაციისა და რეზერვის კონცეფცია“ იქნება პროდუქტი, რომელშიც თანაბრად აისახება სამხედროების ხედვა, როგორი რეზერვი სჭირდება შეიარაღებულ ძალებს და, მოქალაქეების მზადყოფნა, თუ როგორი ფორმით მიიღებენ ისინი მონაწილეობას ქვეყნის თავდაცვაში. სწორედ ამიტომ, კონცეფციის სამუშაო ვერსიას გაეცნობიან არა მხოლოდ სამხედრო თემატიკაზე მომუშავე ექსპერტები და არასამთავრობო ორგანიზაციები, არამედ, სტუდენტებიც.
საჯარო დისკუსიის მიზანია, საზოგადოების სხვადასხვა წარმომადგენლებმა აქტიური მონაწილეობა მიიღონ ჯერ საკითხის განხილვაში, შემდეგ კი რეზერვის ორგანიზების პრაქტიკულ ღონისძიებებში.
