20 და 21 აპრილს, საქართველოს კულტურისა და ძეგლთა დაცვის სამინისტროსა და თბილისის მერიის კულტურული ღონისძიებების ცენტრის მხარდაჭერით, რუსთაველის თეატრში, რობერტ სტურუას სპექტაკლის „შექსპირი სიყვარულზე“ პრემიერა გაიმართება.
2016 წლის აპრილში უილიამ შექსპირის გარდაცვალებიდან 400 წელი სრულდება. აღნიშნულ თარიღს მსოფლიოს სახელოვნებო სამყარო სხვადასხვა ღონისძიებით თუ წარმოდგენით აღნიშნავს.
ქორეოგრაფიული ფანტაზია – „შექსპირი სიყვარულზე” დიდი შემოქმედის პიესებსა და სონეტებს (სიყვარულის თემის ირგვლივ) სინთეზური სანახაობით აერთიანებს. შექსპირისეულ სიუჟეტებს მსახიობები სხეულის ენით გაითამაშებენ და ცნობილ პერსონაჟებს თანამედროვე ცეკვის ენით გააცოცხლებენ. სპექტაკლში გამოყენებულია შექსპირის სონეტების აუდიო ჩანაწერი და ორი დიდი კომპოზიტორის – ვოლფგანგ ამადეუს მოცარტის და ჯონ კეიჯის ნაწარმოებები. დადგმაში მონაწილეობას მიიღებს პიანისტი ნინო ჟვანია, რომელიც ამერიკული ავანგარდული და ელექტრონული მუსიკის წარმომადგენელის ჯონ კეიჯის საფორტეპიანო კომპოზიცებს ცოცხლად შეასრულებს.
