დღეს, 14:00 საათზე, თბილისის „ივენთ ჰოლში“ ქართული წიგნის ფესტივალი „წიგნი და მუსიკა“ გაიხსნება. ღონისძიებას საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, თბილისის მერის მოადგილე ნინა ხატისკაცი, ფესტივალის დამფუძნებლები გია ქარჩხაძე და თინათინ მამულაშვილი დაესწრებიან.
21 აპრილიდან 24 აპრილის ჩათვლით, საქართველოს კულტურისა და ძეგლთა დაცვის სამინისტროს, თბილისის მერიის მხარდაჭერითა და „ქართული წიგნის ინსტიტუტის“ ორგანიზებით, ფილარმონიაში ქართული წიგნის ფესტივალი „წიგნი და მუსიკა“ ჩატარდება. 4 დღის განმავლობაში ფესტივალის სტუმრებს შესაძლებლობა ექნებათ შეიძინონ წიგნები დიდი ფასდაკლებით, დაესწრონ წიგნების პრეზენტაციებს და მოისმინონ ცოცხალი მუსიკა. ფესტივალი, რომელიც მეორედ ტარდება, წიგნისა და საავტორო უფლებების დაცვის საერთაშორისო დღეს ეძღვნება.
ფესტივალის ფარგლებში მკითხველებთან შეხვედრებს გამართავენ დათო ტურაშვილი, ლაშა ბუღაძე, ეკატერინე ტოგონიძე, თამთა მელაშვილი, თამარ კვიჟინაძე, მერაბ ფიფია, ანა ჭაბაშვილი. ფესტივალის მთავარ სცენაზე კონცერტებს გამართავენ მუსიკოსები და ბენდები: The Bear Fox, წერილი, მწვანე ოთახი, შოთა ადამაშვილი, Backwarmer, რეზო კიკნაძე, Soft Eject Systems, Lady Heroine, The Window, Blue Sun, The Black Marrows.
„წიგნი და მუსიკა“ პირველად 2015 წელს, 22-24 მაისს თბილისის „ივენთ ჰოლში“ ჩატარდა. მისი განმასხვავებელი ნიშანი და ამავე დროს წარმატების გასაღები კულტურის სხვადასხვა მიმართულების ერთ სივრცეში გაერთიანებაა. ფესტივალზე წარმოდგენილი იყვნენ გამომცემლობები, წიგნის მაღაზიები, კაფეები. ფესტივალის მიმდინარეობისას მოეწყო სხვადასხვა ავტორისა და წიგნის წარდგენა, საჯარო ლექციები და კითხვა. დამთვალიერებლებს ჰქონდათ საშუალება მოესმინათ სხვადასხვა მუსიკალური ჯგუფისთვის, დასწრებოდნენ კულინარიულ მასტერკლასებს და შოუებს. ფესტივალის სტუმარი ბავშვებისთვის ეწყობოდა კითხვის საათები, ხატვის და ხელოვნების გაკვეთილები.
