ანდერს ბრეივიკმა ნორვეგიის წინააღმდეგ სასამართლო პროცესი მოიგო. სასამართლოს დადგენილებით, სახელმწიფომ დაარღვია ადამიანის უფლებათა კონვენციის მესამე მუხლი, რომელიც ციხეში პატიმრებისადმი არაადამიანურ მოპყრობას კრძალავს.
სასამართლოს გადაწყვეტილებით, სახელმწიფო ვალდებულია ბრეივიკს 331 ათასი ნორვეგიული კრონი (დაახლოებით 40 ათასი დოლარი) გადაუხადოს.
ანდრს ბრეივიკმა ციხეში ყოფნა წამებას შეადარა და ნორვეგიის მთავრობა ადამიანის უფლებათა ევროპული კონვენციის ორი მუხლის დარღვევაში დაადანაშაულა. ბრეივიკის ადვოკატი აცხადებდა, რომ პატიმარი, რომელიც სასჯელს ოსლოდან 100 კილომეტრში მდებარე შიენის ციხეში იხდის, ძლიერი სტრესის მდგომარეობაში იმყოფება.
ბრეივიკი სასჯელს სამოთახიან საკანში იხდის,სადაც მას აქვს ტელევიზორი და კომპიუტერი ინტერნეტთან წვდომის გარეშე. ექტსრემისტული ქსელის შექმნის თავიდან აცილების მიზნით, მისი კონტაქტები გარე სამყაროსთან შეზღუდულია, მისი მიმოწერა მკაცრად კონტროლდება.
ეს პირველი შემთხვევა არ არის, როდესაც ანდერს ბრეივიკი პატიმრობის პირობებს უჩივის. გასული წლის სექტემბერში ის ციხის დირექციას შიმშილობის დაწყებით დაემუქრა. ბრეივიკი შიენის ციხეში 2013 წელს გადაიყვანეს, მანამდე ის სასჯელს ილას საპატიმროში იხდიდა, სადაც საკნის ინტერიერისა და ფანჯრიდან ცუდი ხედის გამო უკმაყოფილებას გამოთქვამდა. ანდერს ბრეივიკი ასევე აპროტესტებდა იმას, რომ მასთან ყავა არასათანადოდ ცხელი მიჰქონდათ და პურთან ერთად ცოტა კარაქს აძლევდნენ.
ანდერს ბრეივიკს 2011 წელს განხორციელებული ორი ტერორისტული აქტის გამო 21-წლიანი პატიმრობა შეეფარდა. ოსლოში ბრეივიკის მიერ ორგანიზებული აფეთქების შედეგად რვა ადამიანი დაიღუპა. კუნძულ უტოიაზე საზაფხულო ბანაკში ბრეივიკმა სტუდენტებს ცეცხლი გაუხსნა, რასაც 69 ადამიანი ემსხვერპლა.
დაღუპულთა შორის საქართველოს მოქალაქე – თამთა ლიპარტელიანიც იყო.
ნატალია ჯალაღონია