“ნაციონალური მოძრაობის” გენერალური მდივანი ვანო მერაბიშვილი ხელისუფლებას ოპონენტების მიმართ “ცინიკური დამოკიდებულების” მორიგ გამოვლენაში ადანაშაულებს და აცხადებს, რომ ოჯახის წევრებთან შეხვედრისა და მათთან სატელეფონო საუბრის საშუალება დღემდე არ მიცემია.
“მიუხედავად იმისა, რომ საქართველოს მთავრობის წარმომადგენლებმა უცხოურ დელეგაციებთან ოფიციალურ თუ არაოფიციალურ გარემოში შეხვედრებზე საუბრის დროს, არაერთხელ დადეს პირობა სხვადასხვა საკითხებზე, მათ შორის ჩემთვის ოჯახის წევრებთან შეხვედრის და მათთან სატელეფონო საუბრის უფლების მოცემაზე, მე დღემდე არ მეძლევა აღნიშნული უფლებით სარგებლობის საშუალება. უფრო მეტიც, არ მაქვს საშუალება პირადი წერილი მივწერო ჩემს მშობლებს ან მეუღლეს.
სამწუხაროდ, ხელისუფლების წარმომადგენლები ხშირად ცრუობენ, როდესაც აცხადებენ, რომ მე ოჯახთან შეხვედრას თუ ტელეფონით საუბარს კანონმდებლობა მიკრძალავს. კანონის მიხედვით პროკურატურას, სასჯელაღსრულების დეპარტამენტს ან ციხის ადმინისტრაციას შეუძლია დამრთოს ნება ვისარგებლო აღნიშნული უფლებებით. თუმცა, მიუხედავად ჩემი ადვოკატების არაერთი მიმართვისა, აღნიშნული უწყებები თავს იკავებენ პასუხის გაცემისგან”, – ნათქვამია ვანო მერაბიშვილის განცხადებაში, რომელიც სოციალურ ქსელ “ფეისბუქში”, მის გვერდზე გამოქვეყნდა.
მერაბიშვილის შეფასებით, მსგავსი ქმედება წარმოადგენს დღევანდელი ხელისუფლების მხრიდან ოპონენტების და ზოგადად პოლიტიკური ოპოზიციის მიმართ ცინიკური დამოკიდებულების მორიგ გამოვლინებას.
24.07.13
