ახალი ქართული ბრენდი, რომელსაც მსოფლიოში ანალოგი არ აქვს. „პოპულუსის“ ხის ჩანთების შემქნელები მარიამ სიორდია, დავით ვაზაგაშვილი და თინა ოსაძე არიან.
ჩანთები მთლიანად ხისგან მზადდება, სარჩულად გამოყენებულია ქეჩა, დამზადების პროცესში იყენებენ ხევსურულ ნაქარგს, მაქმანის დეტალებს და ტყავსაც კი. საშიშროება იმის, რომ ჩანთა შეიძლება გატყდეს ,ბრენდის შემქმნელების თქმით, არ არსებობს. მათი ჩანთების მთავარი უპირატესობაც სწორედ ხარისხია. ხის მასალას სახელოსნოში ყიდულობენ, პირველ ეტაპზე ფანერს, ახლა კი წიფელს იყენებენ.
„თბილისი თაიმსს“ ახლადშექმნილი ბრენდისა და მისი სამომავლო გეგმების შესახებ თინა ოსაძე ესაუბრა.
საიდან გაჩნდა იდეა, რომ შექმნილიყო ჩანთების ბრენდი „პოპულუსი“ და როგორია მისი დაარსების ისტორია?
ჩანთების შექმნის იდეა დიდი ხანია გვქონდა, ინსპირაციის წყარო ილიაუნის ფაბლაბი გახდა. სწორედი ილიაუნის „ფაბლაბში“ არსებული ტექნიკური რესურსის გაცნობის შემდეგ დავიწყე ფიქრი ხის ჩანთების შექმნაზე, მაგრამ უშუალოდ იდეის პროტოტიპირებაზე მუშაობა თებერვლიდან მარიამ სიორდიასთან ერთად დავიწყეთ ინოვაციების სააგენტოს პროექტის („დაიწყე ბიზნესი ფაბლაბთან ერთად“) ფარგლებში. პროექტის დასრულების შემდეგ კი დამოუკიდებლად გავაგრძელეთ მუშაობა..
რა უპირატესობები აქვს ჩანთებს სხვა ჩანთებისგან, რამდენად მოსახერხებელია და რატომ უნდა აირჩიოს მომხმარებელმა იგი?
– პოპულუსის ჩანთები რადიკალურად განსხვავდება სხვა ჩანთებისგან, ეს ინოვაციიაა ქართულ ბაზარზე – ეროვნული კულტურისთვის დამახასიათებელი ორნამენტებით გაფორმებული ხის ჩანთები და ამავდროულად, ვფიქრობ, ძალიან დახვეწილი, ორიგინალური და ხარისხიანი პროდუქტია. იმდენად კომფორტულია თითოეული ჩანთა… პირველ ეტაპზე ჩვენ თვითონაც კი ვერ წარმოგვედგინა, ხე თუ ასეთი მოქნილი მასალა იქნებოდა, მაგრამ შედეგი საოცარი გვაქვს.
როგორ იქმნება ჩანთები, სამუშაო მასალაზე და მისი შექმნის ეტაპებზე,რომ გვესაუბროთ?
– თავდაპირველად ესკიზებს ვქმნით, შემდეგ ლაზერული მჭრელის საშუალებით ვჭრით ხეს და ვიწყებთ ხის ხელით დამუშავებას. ჩანთის სარჩულად ვიყენებთ ქეჩას და შემდეგ ეტაპი სწორედ ქეჩის დამუშავებაა, ხისა და ქეჩის სინთეზი კიდევ უფრო საინტერესოსა და ნატურალურს ხდის ჩვენს პროდუქტს.. უკვე გამზადებულ ჩანთას ხევსურული ნაქარგი ორნამენტებით ან ტყავისა და მაქმანის დეტალებით ვაფორმებთ. ორნამენტები შეგვიძლია შევცვალოთ მომხმარებლის სურვილისამებრ, დავამატოთ ან საერთოდ არ გავუკეთოთ..
რა სირთულეები შეგხვდათ ბრენდის ჩამოყალიბების პროცესში და დაახლოებით, რამდენი ადამიანი მუშაობთ ?
– ახლა განვლილ 3 თვეზე რომ ვსაუბრობთ გვეცინება ხოლმე, ბევრი რამ გაგვიჭირდა მაგრამ აქამდე ყველა პრობლემა მარტივად გადავლახეთ და იმედია სამომავლოდაც ასე გაგრძელდება..
ამ ეტაპზე სულ სამნი ვართ.. მე და მარიამ სიორდია დიზაინზე ვმუშაობთ, დავითი კი გრაფიკაზე, თუმცა საჭიროების შემთხვევაში ერთმანეთის ფუნქციებსაც ვითავსებთ ხოლმე.
რას ნიშნავს სახელი „პოპულუსი“?
– პოპულუსი ლათინური სიტყვაა და ხეს ნიშნავს.. გარადა ამისა არსებობს პოპულუსის ხეც – საქართველოში ვერხვის სახელითაა ცნობილი.
პროდუქციის რეალიზაციაზე, რომ გვესაუბროთ,ხართ თუ არა კმაყოფილები და სად უნდა შეიძინოს მომხარებელმა თქვენი ჩანთები და როგორია ფასები?
– პირველი გამოფენა-გაყიდვა 8 მარტს გვქონდა თბილისი მოლში, მას შემდეგ პროდუქტის რეალიზაციას ფეისბუქ გვერდის საშუალებით ვცდილობთ და ამ ეტაპზე საკმაოდ ბევრი შეკვეთა გვაქვს. გვახარებს ის ფაქტი, რომ ჩვენი ჩანთები ბაზარზე გამოჩენისთანავე არამარტო ქართველ, ასევე უცხოელი დამთვალიერებლებშიც დიდ ინტერესს იწვევს. ამ ეტაპზე ფასები 70 ლარიდან 100 ლარამდე მერყეობს.
როგორია თქვენი სამომავლო გეგმები და უკავშირდება თუ არა იგი პროდუქციის საზღვარგარეთ გატანას?
– ბევრი ახალი იდეა გვაქვს, სამომავლოდ არამარტო ჩანთების ხაზის განვითარებას, ასევე ახალი ხაზის დამატებასაც ვფიქრობთ. სარეალიზაციოდ კი არამარტო ონლაინ სივრცის, ასევე აქსესუარის მაღაზიების ათვისებასაც ვაპირებთ.
პროდუქტი, რომელსაც ჩვენ ვქმნით ნამდვილად არის საერთაშორისო დონის და ვაპირებთ საზღვარგარეთ გატანას.
ეს არ არის უბრალოდ საქართველოში ნაწარმოები პროდუქტი, იგი ჩვენი ეროვნული კულტურის პოპულარიზაციას შეუწყობს ხელს.
ნათია კეკენაძე
