ბაჩო ახალაიას შს მინისტრობის პერიოდთან დაკავშირებულ ბრალდებაზე სასამართლო პროცესი 26 ივლისს გაგრძელდება, განაჩენი კი, სავარაუდოდ, 2-3 პროცესში დადგება, – ამის შესახებ დღეს თბილისის საქალაქო სასამართლოში გამართული პროცესის შემდეგ ახალაიას ადვოკატებმა განაცხადეს.
მათი ინფორმაციით, დაცვის მხარის რამდენიმე მოწმის დაკითხვა დარჩა, რის შემდეგაც მხარეები დასკვნით სიტყვას წარმოთქვამენ.
რაც შეეხება დღევანდელ სასამართლო პროცესს, პროცესზე დაიკითხა დაცვის მხარის 5 მოწმე. როგორც სასამართლო პროცესის დასრულების შემდეგ ახალაიას ერთ-ერთმა ადვოკატმა, გოგა ონიანმა განაცხადა, მოწმეებმა, რომლებიც 7 სპეცრაზმელის წამების საქმეზე დაიკითხნენ დაადასტურეს, რომ რეინჯერის კურსის გავლისას შეურაცხმყოფელი ქმედებები წვრთნების ნაწილია. კერძოდ, გოგა ონიანის თქმით, დღეს დაკითხული 5 პირი ინსტრუქტორები არიან, რომლებსაც პირადად აქვთ რეინჯერის კურსი გავლილი.
“მოწმეებმა დღეს გამიჯნეს, რომ ეს კურსი ჩვეულებრივი მოქალაქისთვის შეიძლება იყოს არაადამიანური მოპყრობის ტოლფასი, თუმცა როდესაც ჯარში ხარ, ხოხიალი, “ატჟიმანიები” და დილით ადრე გაღვიძება, არაადამიანური მოპყრობა არ არის. მათ განმარტეს, რომ ე.წ. ტყვედ ყოფნის კურსი აქვთ გავლილი, როდესაც შეურაცხყოფას აყენებენ და მოღალატეებს უწოდებენ. ეს კურსი ემსახურება იმ საფრთხეს, რომ როდესაც ადამიანი ტყვედ ჩავარდება, პირველივე დაძახებაზე არ გასცეს საიდუმლო ინფორმაცია”, – განაცხადა გოგა ონიანმა.
თავის მხრივ, ბრალდების მხარის პროკურორმა, შაქრო ზაალიშვილმა პროცესის დასრულების შემდეგ ჟურნალისტებთან კომენტარი გააკეთა.
“მოწმეებმა ცალსახად დაადასტურეს, რომ რეინჯერის კურსში არ შედის ცემა-წამება, ბოქლომის დადება, ჩაკეტვა, გაშიშვლება და უკანა ტანში ჯოხების გაკეთება. ასევე ეროვნული და პარტიული ნიშნით ადამიანების ცემა და წამება. მათ სრულად გაიზიარეს ბრალდების მხარის პოზიცია. ჩვენს მიერ დასმულ შეკითხვებზე ამბობდნენ, რომ პროგრამაში მსგავსი ქმედებები არ არსებობს. ისინიც რეინჯერები არიან, გავლილი აქვთ ეს კურსი და ამბობენ, რომ ასეთ ფაქტებს ადგილი არ ჰქონია”, – განაცხადა შაქრო ზაალიშვილმა.
პროკურორმა აღნიშნა, რომ ბრალდების მხარე დასკნითი სიტყვისთვის მზად არის.
აღნიშნულ სისხლის სამართლის საქმეში ბაჩო ახალაიას ბრალად ედება განსხვავებული პოლიტიკური შეხედულებების გამო 7 სპეცრაზმის თანამშრომლის წამების ორგანიზება იაღლუჯას საწვრთნელ ბაზაზე. საქმეში არსებობს 7 დაზარალებული, ხოლო ბრალი წაყენებული აქვს 8 პირს, საიდანად პატიმრობაში მხოლოდ ბაჩო ახალაია იმყოფება, დანარჩენი პირების ნაწილს – საპროცესო შეთანხმება გაუფორმდა, ნაწილი კი გირაოს სანაცვლლოდ პატიმრობიდან გაანთავისუფლეს.
სასამართლო პროცესი 26 ივლისს 11:00 საათზე გაგრძელდება.
24.07.13
