გერმანიის, ავსტრიისა და შვეიცარიის საელჩოების ორგანიზებით, პროექტი „გერმანული ენის თვე“ ოფიციალურად ხვალ 26 აპრილს 19:30 საათზე მოძრაობის თეატრში ჯგუფ „GANKINO CIRCUS“-ის შოუ-კონცერტით გაიხსნება.
დღეს 25 აპრილს 17:30 საათზე ჯგუფის წევრები ორგანიზატორებთან ერთად მოძრაობის თეატრში (აღმაშენებლის გამზ. 182, მუშტაიდის ბაღი) იქნებიან.
ჯგუფი „GANKINO CIRCUS“ პირველად ჩამოვიდა საქართველოში და ქართველი მსმენელის წინაშე ხვალ პირველად წარსდგება. ეს არის 4 კაცისგან შემდგარი პოპულარული გერმანული ჯგუფი, რომელიც უკრავს ხალხურ მუსიკას, მაგრამ მათი გამოსვლა მსოფლიოს მუსიკალურ წარმოდგენას უფრო ჰგავს.
2012 წელს ევროპული ფოლკლორის ცნობილი პრიზით „Eiserner Eversteiner“ დაჯილდოვებული ჯგუფის კონცერტი გაზეთმა „Süddeutsche Zeitung“-მა ასე შეაფასა „ანარქისტული, გადარეული და ბრწყინვალე“.
ჯგუფის წევრები არიან რალფ ვილანდი (გიტარა, ვოკალი), სიმონ შორნდანერი (საქსოფონი, კლარნეტი), მაქს ედერი (აკორდეონი, დასარტყამი ინსტრუმენტები) და იოჰანეს ზენსი (დასარტყამი ინსტრუმენტები). მათ 2007 წელს დიტენჰოფენში ჩამოაყალიბეს ჯგუფი, რომელსაც ბულგარული ცეკვის სახელი „განკინო“ დაარქვეს. ჯგუფი უკრავს სიმღერებს და ჰყვება ისტორიებს საკუთარი სამშობლოდან. ეს არის იმ დროის მუსიკა და ტექსტები, როდესაც ჯერ კიდევ ნამდვილი ხალხური მუსიკა არსებობდა. მათ ფართო რეპერტუარშია არა მარტო მშობლიური ფოლკლორული მუსიკა, არამედ იმ ქვეყნების ხალხური სიმღერებიც, სადაც ჯგუფი გამოდიოდა, – მაგალითად უკრაინაში, სერბეთში, ყაზახეთში, სომხეთში, იტალიასა და საფრანგეთში.
მუსიკოსებმა თავიანთი სადებიუტო ალბომი „Das Potpourri Des Herrn Baron Von Gunzenhausen“ 2010 წელს გამოუშვეს. შემდეგ წელს კი იყო მეორე ალბომი „Zum Ersten Mal In Ihrer Stadt“. საბოლოოდ, განსაკუთრებული წარმატება ჯგუფს 2014 წელს მესამე ალბომმა „Franconian Boogaloo“ მოუტანა. 2015 წელს მუსიკოსებმა გოეთეს ინსტიტუტისათვის ტურნე გამართეს ცენტრალურ აზიაში, ასევე გამოდიოდნენ გერმანულ პავილიონში გამოფენა „ექსპოზე“ მილანში.
