საქართველოს რეგიონული განვითარებისა და ინფრასტრუქტურის სამინისტრომ პირველი ექვსი თვის მონაცემები შეაჯამა.
როგორც მინისტრმა დავით ნარმანიამ განაცხადა, მიმდინარე წლის ექვსი თვის ინფრასტრუქტურული სამუშაოების ღირებულება 10%-ით აჭარბებს 2012 წლის ამავე პერიოდში დაფიქსირებულ მონაცემებს.
“გაწეული ხარჯების საკასო შესრულება შეადგენს 223 მილიონ ლარს, რაც 21 მილიონი ლარით აღემატება გასული 2012 წლის შესაბამის პერიოდში ამ მიზნით გაწეული ხარჯების საკასო შესრულებას (202 მილიონი ლარი). საგზაო ინფრასტრუქტურის გაუმჯობესების ღონისძიებების დაფინანსების მიზნით გაწეული ხარჯების საკასო შესრულებამ 2013 წლის ექვს თვეში შეადგინა 155 მილიონი ლარი. დაფინანსებულია 44 მილიონი ლარით, ანუ 40%-ით მეტი ღირებულების პროექტები 2012 წლის შესაბამის პერიოდთან შედარებით. ამ მიზნით, 2012 წლის ექვსი თვის საკასო შესრულება შეადგენს 111 მილიონ ლარს”, – განაცხადა ნარმანიამ.
მისივე თქმით, გზების მშენებლობა და მოვლა-შენახვისთვის 2013 წლის ექვს თვეში გაწეული ხარჯების საკასო შესრულება შეადგენს 68 მილიონ ლარს, რაც 22 მილიონი ლარით, ანუ 47%-ით აღემატება ამავე მიზნით 2012 წლის ექვს თვეში საკასო ხარჯების მაჩვენებელს.
ნარმანიას ინფორმაციით, ჩქაროსნული ავტომაგისტრალების მშენებლობის პროექტის ფარგლებში საკასო ხარჯმა შეადგინა 84 მილიონი ლარი, რაც 37%-ით აღემატება გასული წლის შესაბამის პერიოდში ამ მიზნით დაფინანსებული სამუშაოების ღირებულებას.
“სამუშაოები ერთდროულად მიმდინარეობს სამ მონაკეთზე, კერძოდ: რუისი-აგარის მონაკვეთზე, ქობულეთის შემოვლით გზაზე და ზესტაფონი-ქუთაისი-სამტრედიის მონაკვეთზე”, – აღნიშნა ნარმანიამ.
რაც შეეხება ტენდერებს, მისი თქმით, გამოცხადებული ელექტრონული ტენდერების რაოდენობა გასული წლის ამავე პერიოდთან შედარებით გაზრდილია.
“მიმდინარე წლის პირველ ექვს თვეში გამოცხადდა სულ 183 ელექტრონული ტენდერი შესყიდვის საერთო ღირებულებით – 830 მილიონი ლარი, რაც 38%-ით მეტია გასული წლის ამავე პერიოდში გამოცხადებული ტენდერების რაოდენობაზე. გამოცხადებული 183 ტენდერიდან 25 ტენდერი არის საერთაშორისო, შესყიდვის სავარაუდო ღირებულებით 692 მილიონი ლარი, ხოლო 158 ტენდერი სახელმწიფო შესყიდვებით სავარაუდო ღირებულებით – 139 მილიონი ლარი. საავტომობილო გზების დეპარტამენტის მიერ ამავე პერიოდში გამოცხადდა სულ 154 ტენდერი, ჯამური სავარაუდო ღირებულებით 714 მილიონი ლარი. მათ შორის: სახელმწიფო შესყიდვებით 138 ტენდერი, შესყიდვის საერთო ღირებულებით 138 მილიონი ლარი და საერთაშორისო 16 ტენდერი, შესყიდვის საერთო ღირებულებით – 575 მილიონი ლარი. მუნიციპალური განვითარების ფონდის მიერ კი გამოცხადდა 117 მილიონი ლარის ღირებულების ტენდერი”, – აღნიშნა ნარმანიამ.
25.07.13