„მე არ ვიცი როგორი იქნება ჩემი ცხოვრება მომავალში, მაგრამ ერთი რამ ვიცი ზუსტად. ამაზე უფრო მნიშვნელოვან საქმეს ვერასოდეს მოვემსახურები. ამაზე მეტად საპატივცემულო საქმე ვეღარ მექნება. თუ მექნება საშუალება, რომ არჩევნების შემდეგ გავაგრძელო მუშაობა ამ თანამდებობაზე, სიამოვნებით გავაკეთებ ამას. “თანამდებობაზე დანიშვნიდან ზუსტად ერთი წლის შემდეგ თავდაცვის მინისტრი თინა ხიდაშელი თავის საქმიანობას აჯამებს ტელეკომპანია „GDS”-ზე გადაცემა „2030“-ის ეთერში.
„ქართული ჯარი არის ზუსტად ისეთი, როგორიც ქართული სახელმწიფო. მას აქვს იგივე პრობლემები, რაც თითოეულ მოქალაქეს და იგივე გამოწვევები,რაც ქართულ სახელმწიფოს. ქართული ჯარი არის ქართული საზოგადოების საუკეთესო ნაწილი.
მე პირადად ვიამაყებ ამ ერთი წლით. ქართული ჯარი, როგორც ინსტიტუტი არ არის პოლიტიზირებული. მათ თავისი არჩევანი უნდა გააკეთონ თავისუფლად. ამისთვის გავაუქმეთ სპეც-უბნები. პროფესიული რეზერვი არის მნიშვნელოვანი პროპაგანდისტული ომის პირობებში. შესაძლებელია საკუთარი ქვეყნის რეზერვში იყოს ნებისმიერი პროფესიის ადამიანი. მათ შორის ჟურნალისტი, ბანკირი და ა.შ. ადამიანები აკეთებენ არჩევნებს იმსახურონ იქ,სადაც უნდათ. ეს არის მთავარი მიღწევა.
ჯარი ვერ იქნება თავისუფლების გარანტი, თუ მის მოქმედებას მხარს არ უჭერს დანარჩენი საზოგადოება. ჩვენ დავიწყეთ პროექტი, რომელშიც კერძო ბიზნეს-კომპანიებია ჩართული. ვეხმარებით სამხედრო პირებს,რომ შევუმსუბუქოთ ყოველდღიურობა. როცა ქართველი ჯარისკაცი არის ბრძოლის ველზე მან უნდა იცოდეს,რომ მისი ოჯახი არის დაცული და უზრუნველყოფილი.
მნიშვნელოვანია “Army Card”-ის პროექტი. სამხედრო მოსამსახურე ვერ ითამაშებს თავისი სახელფასო ბარათით და ეს იქნება ერთგვარი დაზღვევა. სამწუხაროდ სუიციდის შემთხვევების ერთ-ერთი მიზეზი არის სწორედ აზარტული თამაშები.“
თინა ხიდაშელმა ისაუბრა ასევე სავალდებულო სამხედრო გაწვევის გაუქმების მნიშვნელობაზე
„შეუძლებელია იყო ბედნიერი, როცა ხარ ახალგაზრდა და გაიძულებენ რამის გაკეთებას. როცა ამაზე არ გიფიქრია, არ გიოცნებია. ძალადობა ქართულ ჯარს არ სჭირდება. ყველა ქმედუნარიანი ქალი და მამაკაცი, რომ იარაღით ხელში დადგეს, ომს რაოდენობით მაინც ვერ მოვიგებთ. საქართველოს წარმატება არ არის რაოდენობაში. წარმატების საიდუმლოება არის პატარა, მაგრამ პროფესიონალი, მოქნილი და „ნატო“-ს სტანდარტების ჯარი.
ვარშავის სამიტი არის სამიზნე ჩვენი მოწინააღმდეგისთვის,რომ გააღვივოს არაადეკვატური მოლოდინი. მე ვიცი, რომ საქართველო აუცილებლად გახდება ნატოს წევრი. ღია კარის პოლიტიკა არის ღია კარის პოლიტიკა და არაფერი შეცვლილა. ყველამ თქვა, რომ მონტენეგროს შემდეგ გაჩერება საქართველოა,“- ამბობს თინა ხიდაშელი.
მანანა ღოღობერიძე
