„მე არ ვარ ის ადამიანი, რომელიც ვიღაცის თამაშს ითამაშებს და იქნება მართული. ვიცი, რომ ბევრი განაწყენდით მაგრამ სხვა გზა არ არის. ვამბობ უარს კაბინეტურ მმართველობაზე და ვიწყებ ახლიდან,“ – „ერთიანი ნაციონალური მოძრაობის“ უკვე ყოფილმა წევრმა გიორგი ვაშაძემ საკუთარი გადაწყვეტილების მიზეზებზე ისაუბრა ტელეკომპანია „მაესტროს“ ეთერში გადაცემა „კონტაქტში“.
„მიხეილ სააკაშვილმა დიდი როლი ითამაშა, რომ იმ საქართველოში გვეცხოვრა სადაც ვცხოვრობთ. მე ბოლომდე არ ვკარგავდი იმედს, რომ „ნაციონალური მოძრაობა“ მოახდენდა ტრანსფორმაციას. ჩვენ ბევრჯერ გვისაუბრია პრობლემებზე, თუმცა სამწუხაროდ ეს ვერ მოხდა. პარტიის მმართველობა ხელში ჩაიგდო რამდენიმე ადამიანმა.
დაიღალა ხალხი ათწლეულების განმავლობაში ერთი და იმავე სახეებით. საქართველოს ჰაერივით სჭირდება ახალი პოლიტიკური ძალა. ამას ხალხიც ითხოვს. ისევ სკამები გონიათ პრობლემა. მე სკამზე უარი ვთქვი. მინდა ახალი ენერგიით მივიღო მონაწილეობა ქვეყნის განვითარებაში.
მოკავშირედ მოვიაზრებ ყველას მოქალაქეს, მაგრამ არც ერთ პოლიტიკურ პარტიაში შესვლას არ ვაპირებ. ახალი თაობა უნდა მოვიდეს პოლიტიკაში ახალი იდეებით. სიმართლეს და გულწრფელობას ალტერნატივა არ აქვს. მიზანი არის 2016 წლის არჩევნები,“ – განაცხადა გიორგი ვაშაძემ.
მანანა ღოღობერიძე
