„მეამბოხე პოლიტიკოსები გამოდიან მშობლიური პარტიებიდან და ახალი პოლიტიკური ძალის დაარსებას აანონსებენ. ეჭვი მეპარება, რომ ეს ახლად ჩამოყალიბებული ძალები იქნებიან კონკურენტუნარიანები პოლიტიკურ ავანსცენაზე,“ – ამის შესახებ ისაუბრა სოციოლოგმა იაგო კაჭკაჭიშვილმა ტელეკომპანია „იმედის“ ეთერში გადაცემა „ქრონიკის სტუდიაში“.
„გიორგი ვასაძეს გაუჭირდება დაარწმუნოს ამომრჩეველი, რომ „ნაციონალური მოძრაობიდან“ წამოვიდა განსხვავებული იდეოლოგიური ღირებულებების და არა პირადი წყენის გამო. პერსპექტივას ვერ ვხედავ ვერც ახლად გარიყული ძალიდან და ვერც „გირჩის“ მხრიდან. მათ გაუჭირდებათ „ნაციონალური მოძრაობის“ ჩრდილქვეშ უნაშთოდ გამოსვლა და საკმარისი მხარდაჭერის მოპოვება.
ამომრჩეველთა დიდი ნაწილი, ჩამოუყალიბებელია თავის მომავალ არჩევანში. სოციოლოგიური კვლევებით ამ ტიპის ამომრჩეველი არის 50-55%. ეს დიდი კოჰორტა ცდუნებას აძლევს პოლიტიკოსებს, იბრძოლონ დამოუკიდებლად.
ახლად აღმოცენებული ძალების გათვლა არის საარჩევნო ბარიერის გდალახვა. ეს არის არარეალური და შეუსრულებადი ამოცანა, თუმცა ისინი ამას ვერ ხვდებიან. დიდია გაღიზიანების და დაძაბულობის ფაქტორი. შესაძლოა, ცდილობენ ემოციური გავლენა დააბალანსონ რაციონალური არგუმენტით, რომ შეძლებენ კონკურენტუნარიანი ძალის ჩამოყალიბებას.
2016 წლის არჩევნები სპეციფიკურია. პოლუსები არ არის მკვეთრი. ის ოდნავ გაბაცებულია. არიან ლიდერები, რომლებსაც არც თუ უიმედო მხარდაჭერა აქვთ. შეუძლებელია არ გავითვალისწინოთ მაგალითად ირაკლი ალასანია. დღევანდელი პოლიტიკური ავანსცენა არ არის ორპოლუსიანი. წონადი რეიტინგი აქვს სხვა პოლიტიკურ ძალებსაც. არჩევნებამდე კიდევ დიდი სივრცეა მხარდაჭერის გასაღრმავებლად,“ – განაცხადა იაგო კაჭკაჭიშვილმა.
მანანა ღოღობერიძე
