„თბილისი თაიმსი“ აგრძელებს ინოვაციური პროექტების თქვენთვის გაცნობას. ამჯერად, სამხატვრო აკადემიის სტუდენტზე, დიზაინერ ლევან ლაშქარაშვილზე და მის ბრენდზე გიამბობთ.
LWood Eyeglasses წარმოადგენს პირველი ქართული ხის სათვალეების ბრენდს. სათვალის დამზადების პროცესში დიზაინერი ხის ჯიშებს შეფერილობიდან, გამძლეობიდან და სხვა სასარგებლო თვისებებიდან გამომდინარე არჩევს. ქართულ ჯიშებთან ერთად უცხოურსაც იყენებს. მაგალითად, ერთ-ერთ მასალას აფრიკული კაკალი წარმოადგენს. ყველაზე ხშირად ნეკერჩხალს, ზეთისხილს, ბზას და ქართულ კაკალს ამუშავებს.
მკითხველისთვის საინტერესო იქნება ზედაპირის დამუშავების პროცესიც. დიზაინერის თქმით, საღებავად და დასამუშავებლად ფუტკრის ცვილის ზეთს იყენებს. გარდა იმისა,რომ ეს მასალა ნატურალურია ხეს ის სუნთქვის საშუალებასაც აძლევს. ამასთანავე, ზედაპირი ანტიალერგიულია და სასიამოვნო არომატიც აქვს.
ქართული სოციალურ-ეკონომიკური რეალობის გათვალისწინებით, ქართული ბრენდის პროდუქციის უმეტესობა საზღვარგარეთ იყიდება. ფასების, იდეისა და პროდუქციის რეალიზაციის დეტალებზე ლევან ლაშქარაშვილს ვესაუბრეთ.
საიდან გაგიჩნდათ იდეა შეგექმნათ ხის სათვალეები და როგორ დაიწყეთ პროდუქციის რეალიზაცია?
– სანამ დავიწყებდი ამ მიმართულებით მუშაობას დიდი ხანი ვფიქრობდი იდიაზე, მაგრამ თვითონ ხის სათვალის იდეა სწავლის დროს გაჩნდა, როდესაც ხის მხატვრულ დამუშავებას ვსწავლობდი აკადემიაში. სათვალე, როგორც აქსესუარი ძალინ მიყვარს და ვფიქრობ, ხით მისი გაკეთება ორიგინალურია სხვა ბევრ დადებით თვისებებთან ერთად . თავიდან იყო, რამდენიმე გამოფენა- გაყიდვა, სადაც მონაწილეობა მივიღე, ასევე მოდის კვირეული, ძირითადად, ონლაინ გაყიდვებით და ინტერნეტ-მაღაზიებით ვუკეთებ რეალიზებას, ასევე ვგზავნი სხვადასხვა ქვეყანაშიც.
როდესაც იდეაზე დავიწყე მუშაობა საჭირო იყო სახელოსნო და ყველა ის საჭირო დაზგა თუ იარაღი, რაც ამ საქმიანობას სჭირდება მგრამ არ იყო ფინანსები. როდესაც იწყებ ბიზნესს ან სხვა ნებისმიერ სამუშაოს ყოველთვის გაქვს სირთულეები და პრობლემები. ჩემთვის ასეთი პრობლემაა ტექნოლოგიაზე მუშაობა და მისი დახვეწა, რამაც საბოლოოდ უნდა შექმნას ხარისხი . ჩემთვის ყველაზე მნიშვნელოვანი ხარისხია.
როგორია ფასები და უშუალოდ პროდუქციის შექმნის პროცესი?
– ფასებს, რაც შეეხება საქართველოში,ძირითადად, 400 ლარიდან იწყება გააჩნია მასალას დიზაინს და ინდივიდუალურ შეკვეთას,ამ შემთხვევაში ფასი იზრდება, რადგან სხვა სამუშაოებს მოითხოვს და შესაბამისად, დროც მეტი სჭირდება. სათვალე მზადდება ნატურალური ხის მასალით და თითოეული ხაზი და დეტალი ხელით არის დამუშავებული, მის ზედაპირს იცავს ნატურალური ცვილზე დამზადებული ზეთი და მასში ჯდება მაღალი ხარისხის პოლარიზებული მინები.
გამოფენა თუ გქონიათ და რამდენად ინტერესდებიან უცხოელები პროდუქციით?
– პერსონალური გამოფენა არ მქონია, მაგრამ სხვადასხვა გამოფენაში ვღებულობ მონაწილეობას. მე ვფიქრობ, რომ უცხოეთში უფრო მეტად არიან დაინტერესებულები იმიტომ რომ, ძირითადად, იქ ვყიდი სათვალეებს. ასევე აქტიურად ხდება პროდუქციის რეალიზაცია უცხოური ინტერნეტმაღაზიებით.
როგორ გესახებათ L Wood-ის სამომავლო პერსპექტივები, რას გეგმავთ და რა სიახლეებს შესთავაზებთ მომხმარებლებს?
– LWood -ი სამომავლოდ მინდა რომ იყოს წარმატებული ბრენდი და ყველაფერს ვაკეთებ იმისათვის რომ მიზანს მივაღწიო. სამომავლოდ მინდა, რომ აუცილებლად გაიხსნას ოფიციალური LWood – ის მაღაზია, სადაც საზოგადოება უფრო კარგად გაეცნობა და შეაფასებს ნამუშევრებს.
ნათია კეკენაძე
