“გასაკვირი არ არის, რომ „ნაციონალური მოძრაობა“ ყოველთვის ცდილობს, ჩვენს წარმატებულ საქმიანობას დაუპირისპიროს სიცრუე,” – ამის შესახებ თბილისის მერმა დავით ნარმანიამ დღეს საკრებულოს სხდომაზე განაცხადა.
თბილისის მერმა საკრებულოს დეპუტატებსა და მოწვეულ სტუმრებს სიტყვით მიმართა და აღნიშნა, რომ მზად არის საზოგადოებისთვის აქტუალურ ყველა კითხვას ამომწურავი პასუხი კიდევ ერთხელ გასცეს.
”მოვედი, რომ დავასრულო სიცრუის პროპაგანდა და ტირაჟირება, რომლითაც ოპონენტები საზოგადოების, ჩვენი თანამოქალაქეების შეცდომაში შეყვანას ცდილობენ. კიდევ ერთხელ პასუხი გავცე ყველა შეკითხვას და იმ შემთხვევაში, თუ კონკრეტული პირები დღესაც შეეცდებიან სპექტაკლის დადგმას, ეს იქნება მათი მხრიდან კიდევ ერთი მცდელობა იმისა, რომ საზოგადოებამ არ მიიღოს ზუსტი და ამომწურავი ინფორმაცია, შესაბამისად, ეს იქნება მათი პასუხისმგებლობა თბილისელების წინაშე. მანამ, სანამ კითხვა-პასუხის რეჟიმზე გადავიდოდეთ, მე მინდა, მივმართო თბილისელებს – გასაკვირი არ არის, რომ „ნაციონალური მოძრაობა“ ყოველთვის ცდილობს, ჩვენს წარმატებულ საქმიანობას დაუპირისპიროს სიცრუე და ხელოვნური აჟიოტაჟი – ეს მათი სტილია. თუმცა, ჩვენ გვაქვს ფაქტები და შეგვიძლია შევადაროთ, თუ რა კეთდებოდა ქალაქში მათი მმართველობის პერიოდში და რა კეთდება ახლა…
საარჩევნო პერიოდის მოახლოებასთან ერთად ცდილობენ ჩვენს წარმატებულ საქმიანობას დაუპირისპირონ სიცრუე. ცდილიბენ იმას, რომ აჟიოტაჟი ხელოვნურად აწიონ. ეს არის მათი სტილი და აქ გამორჩეული და განსაკუთრებული არაფერია, თუმცა მე დღეს მოვედი კონკრეტული ინფორმაციით, კონკრეტული ფაქტებით, მე დღეს მოვედი კონკრეტული არგუმენტებით, რათა კიდევ ერთხელ ვისაუბრო იმაზე, თუ რა კეთდებოდა ქალაქში ჩვენი ოპონენტების მმართველობის პერიოდში, რა გავაკეთეთ ჩვენ ამ წელიწადნახევრის განმავლობაში და რა გეგმები გვაქვს მომავალში იმ უმთავრეს პრიორიტეტებთან მიმართებაში, რომელიც გაგვაჩნია და რომლითაც მოვედით”, – განაცხადა ნარმანიამ.
თბილისის მერმა სიტყვით გამოსვლისას საბავშვო ბაღების საკითხზეც ისაუბრა და განაცხადა, რომ ”ნაციონალური მოძრაობა” აღნიშნული თემით მანიპულირებას ცდილობს, რეალურად კი ახალი ხელისუფლების პირობებში საბავშვო ბაღების რაოდენობა იზრდება და ინერგება მაღალი სტანდარტები.
„გასულ წლებში, „ნაციონალური მოძრაობის“ მიერ თბილისში სხვადასხვა მიზეზით 50-მდე საბავშვო ბაღი დაიხურა. ჩვენ ამის საპირისპიროდ დავიწყეთ 7 ახალი ბაღის მშენებლობა, აღვადგინეთ დახურული საბავშვო ბაღების ნაწილი და ეს პროცესი ახლაც მიმდინარეობს, მოქმედ ბაღებში აუთვისებელი ფართების გარემონტების შედეგად შევძელით დამატებითი ჯგუფების გახსნა, რაც დაახლოებით 10 საბავშვო ბაღის ტოლფასია. დავასაქმეთ 800-მდე ადამიანი, ბაღის თანამშრომელთა ხელფასები 5%-დან 20%-მდე გავზარდეთ; მათთვის საზოგადოებრივი ტრანსპორტით მომსახურება გახდა უფასო. ჩვენი ხელისუფლების პირობებში საბავშო ბაღები გახდა უფასო. რაც ძალიან მნიშვნელოვანია, მიმდინარე წელს კიდევ 10 ახალი საბავშვო ბაგა-ბაღის მშენებლობას ვიწყებთ“,- განაცხადა დავით ნარმანიამ.
