„ეს იყო ის სცენარი, რაც აწყობდა „ნაციონალურ მოძრაობას“. ყველაფერი გააკეთეს ამ პროვოკაციული განვითარებისთვის. ჩვენ ამ ტიპის მეთოდებზე უარი ვთქვით. „ქართული ოცნების“ ხელწერა არ არის ძალადობა“. კორცხელის ინციდენტის მიზეზების შესახებ პარლამენტის ადამიანის უფლებათა დაცვის კომიტეტის თავმჯდომარე ეკა ბესელიამ „GDS”-ზე, გადაცემა „2030“-ის ეთერში ისაუბრა.
„ძალადობას არავინ მიჩქმალავს, მაგრამ პასუხისმგებლობა უნდა აიღოს ოპოზიციამაც. რატომ აღმოჩნდა კონფლიქტის კერა იქ, სადაც ბოკერია და მისი ჯგუფი იყო. სხვაგან მსგავსი არაფერი მომხდარა.
ყველაფერს აქვს თავისი მიზეზი. როდესაც მსხვერპლი მოძალადეს ხვდება, დაძაბულობის, კონფლიქტის დიდი რისკია. ადამიანები შეხვდნენ წარსულში ძალადობრივი სისტემის არქიტექტორებს. თუმცა ეს არ ათავისუფებს პასუხიმგებლობისგან იმ პირს, რომელსაც კეტი ეჭირა ხელში და მუშტს იქნევდა.
მოხდა პროვოკაცია და სამწუხაროდ ამ პროვოკაციას წამოეგნენ. ვის მხარესაც არ უნდა იყოს მოძალადე, არ აქვს მნიშვნელობა. ჩვენ არ გვჭირდება ძალადობრივი არჩევნები. გამოვედით იმ პერიოდიდან, როდესაც „ნაციონალური მოძრაობა“ ქვებს ისროდა და შემდეგ გადავიდნენ რეზინის ტყვიებზე. უნდა დაველოდოთ გამოძიებას, არ შეიძლება ცხელ გულზე გავატაროთ საჩვენებელი სადამსჯელო ღონისძიებები. ადრე გამოძიებაც არ იწყებოდა, ახლა გამოძიება მყისიერად დაიწყო. მიმდინარეობს მონაწილე პირების იდენტიფიკაცია.
ჩვენ ვთვქით, რომ პოლიცია უნდა იყოს პოლიტიკური პროცესებისგან გამიჯნული. ძალოვანი სტრუქტურა უნდა იყოს ნეიტრალური, ამიტომ იქ იყო პოლიციელთა მცირე რაოდენობა და კონფლიქტის დასაწყისში ვერ მოხერხდა მისი ჩახშობა.“
ეკა ბესელია გადაცემაში ასევე შეეხო გოგა ოთხოზორიას მკვლელობის ფაქტს.
„ეს ტრაგედია იყო შემზარავი ყველასთვის. ყველანაირი შესაძლებლობა უნდა გამოვიყენოთ დამნაშავის დასაჯელად. გამოყენებული იქნება ყველა საერთაშორისო ტრიბუნა, რომ პარტნიორები შეუერთდნენ ჩვენს ემოციას და განწყობას ამ მძიმე ფაქტის შემდეგ“.
მანანა ღოღობერიძე