„გოგა ოთხოზორიას მკვლელობის საკითხს განიხილავენ ჟენევის დისკუსიების ფორმატში, ეს საქმე უნდა გამოიძიონ და დამნაშავე დაისაჯოს,” – ამის შესახებ „NATO“-ს გენერალური მდივნის წარმომადგენელმა კავკასიაში, ჯეიმს აპატურაიმ გადაცემა „ქრონიკისთვის“ მიცემულ ექსკლუზიურ ინტერვიუში ისაუბრა. მან განიხილა ასევე მომავალი ვარშავის სამიტის შესაძლო შედეგები და კორცხელის ინციდენტი.
„არც რუსეთმა და არც რომელიმე სახელმწიფომ არ უნდა იდარდოს საფრთხეზე, რომელიც თითქოს „NATO“-სგან მომდინარეობს. გაფართოება არ ნიშნავს საფრთხეს რუსეთისთვის. ახალი წევრები ევროპის სტაბილურობას შეუწყობენ ხელს და ამით ევროპის ყველა სახელმწიფო იხეირებს.
ხელისუფლება უნდა იყოს ფრთხილად, რადგან „კორცხელის საქმეს“ საერთაშორისი რეზონანსი აქვს. ეს ინციდენტი მთელმა საერთაშორისო საზოგადოებამ ჩაინიშნა. ქართველები ძალიან ემოციურად უდგებიან ყველაფერს, რაც პოლიტიკას ეხება. საქართველო, როგორც ასპირანტი ქვეყანა, უნდა აკმაყოფილებდეს დემოკრატიის მაღალ სტანდარტებს. ამაში წინასაარჩევნო პერიოდიც იგულისხმება.
თუ ასპირანტი ქვეყანა მზადაა წევრობისთვის, ალიანსი თავად იღებს გადაწყვეტილებას. თუმცა საქართველოს წევრობის საკითხი ვარშავის სამიტზე არ გადაწყდება. ჯერ ადრეა კონკრეტულ საკითხებზე საუბარი, მაგრამ სამიტი საფუძველს შექმნის საქართველო-ნატოს მეტი თანამშრომლობისთვის. ნატოს არც ერთი არაწევრი ქვეყანა არ წარდგება ვარშავის სამიტზე ისეთი ხარისხით,როგორც საქართველო. აქ იქნება 2 შეხვედრა მთავრობის დონეზე, ერთი საგარეო საქმეთა მინისტრების. ეს იქნება უნიკალური პლატფორმა. თავდაცვის მინისტრიც სხვადასხვა თემებზე გამართავს კონსულტაციებს. საქართველოში ძალიან ბევრი რამ ხდება და ჩვენ გვინდა ამის აღიარება“.
ჯეიმს აპატურაიმ ინტერვიუში ხაზი გაუსვა „კაბელების საქმის“ მნიშვნელობას.
„მნიშვნელოვანია, რომ ასპირანტ ქვეყნებში,მათ შორის საქართველოში არ ჰქონდეს ადგილი პოლიტიკურად მოტივირებული სასამართლო პროცესების ჩატარების მცდელობასაც კი. ამის შესახებ კითხვებს აჩენს ის ფაქტიც, რომ ჩართულია ყოფილი თავდაცვის მინისტრი“.
მანანა ღოღობერიძე
