„ამ ხელისუფლების ბუნებას, არ ვანსხვავებ სააკაშვილის რეჟიმის ბუნებისგან. სააკაშვილმა მედიის თავისუფლება შეზღუდა შეიარაღებული ბანდით, რომელიც შევარდა იმედის ტელევიზიაში, ივანიშვილი ამას აკეთებს რბილი ძალით“. ამის შესახებ „თავისუფალი დემოკრატების“ ლიდერმა ირაკლი ალასანიამ „რუსთავი-2“-ზე,გადაცემა „არჩევანის“ ეთერში ისაუბრა.
ჩვენმა პარტიამ პირადად იწვნია არაფორმალური მმართველობის შედეგი. სააპელაციო სასამართლოში მიმდინარე პროცესებს, მურუსიძის ხელით პირადად მართავს ბიძინა ივანიშვილი. „თავისუფალი დემოკრატები“ რა თქმა უნდა იქნება სიტყვის თავსუფლების, დამოუკიდებელი მედიის გვერდით. ეს არ არის მხოლოდ მედიის დაცვა, ეს არის საზოგადოების მომავალი განვითარების დაცვა.
ხელისუფლება იმიტომ ავირჩიეთ, რომ ის კი არ განგვისაზღვროს თუ რა დოზით მივიღოთ სიმართლე და რომელ არხს ვუყუროთ, არამედ ავირჩიეთ იმიტომ, რომ იყოს ანგარიშვალდებული. ხელისუფლების ყველა შტომ, მათ შორის სასამართლომ უნდა იგრძნოს პასუხისმგებლობა ხალხის წინაშე. ეს მოირღვა ივანიშვილის შემოთავაზებული ახალი მმართველობის ტიპით.
საზოგადოებას ესმის რა საფრთხე ექმნება ამით ქვეყნის ევროპულ განვითარებას. ბიძინა ივანიშვილს სურს კიდევ ერთხელ დატესტოს საზოგადოების მოთმინება. თუ მოხდა მედიის ამ საშუალების ოკუპაცია, უზურპირება, ბუნებრივია ეს გამოიწვევს სამოქალაქო დაპირისპირებას. ეს იქნება გარდაუვალი,“ – განაცხადა ირაკლი ალასანიამ.
მანანა ღოღობერიძე
