„პროცესი ბუნებრივად გაიწელა, ასცდა ბუნებრივ რიტმს. ჩვენ ეს ყველაფერი რიგის სამიტზე უნდა დაგვესრულებინა. დღეს გვაქვს საფრთხე, რომ ვიზალიბერალიზაცია იქნას დაყოვნებული“. ვიზალიბერალიზაციის პროცესის შემაფერხებელ მიზეზებზე „ნაციონალური მოძრაობის“ წევრმა სერგი კაპანაძემ „რუსთავი-2“-ზე, „შაბათის კურიერის“ ეთერში ისაუბრა.
„მთავარი მიზეზი, რატომაც სიტუაციის აქამდე მიყვანა მოხდა, არის დაკარგული დრო. ჩვენ ძალიან დიდი დრო დავკარგეთ. დღეს ევროპაში მიგრაციული კრიზისია, აღარ არის ისეთი ხელსაყრელი გარემო. ძალიან ძლიერი დინების წინააღმდეგ გვიწევს ცურვა.
ჩვენ 2012 წლის გაზაფხულზე დავიწყეთ დიალოგი ვიზებთან დაკავშირებით. 2012 წლის ბოლოს ველოდით, რომ მოგვცემდნენ სამოქმედო გეგმას. გეგმა იყო, რომ 2013 წლის განმავლობაში დაგვესრულებინა საკანონმდებლო ნაწილი და უკვე 2014 წლის პირველ ნახევარში აღმასრულებელი ნაწილი ანუ შესრულება და ამის მერე დაველოდებოდით პოლიტიკურ გადაწყვეტილებას. იმ გეგმიდან დღევანდელამდე დაახლოებით 2 წელი გავიდა.
ძალიან ბევრი კანონი შეიძლება ადრე ყოფილიყო მიღებული. მაგალითად ანტიდისკრიმინაციული კანონი, პერსონალური დაცვის ინსპექტორის შესახებ კანონი. ეს კანონები ძალაში შევიდა 1 წლით უფრო გვიან, რეალურად შეიძლებოდა ადრე ყოფილიყო მიღებული.გაჭიანურებას თავისი მიზეზები აქვს, 2013-2014 წლების განმავლობაში ხელისუფლება ძირითადად პოლიტიკური ოპონენტების დევნაზე იყო გადასული, სხვა რამეზე ჰქონდა აქცენტი.
პრობლემის მეორე ნაწილიც არსებობს. როდესაც ხელისუფლება ცდილობს მისთვის მნნიშვნელოვანი ნაწილი გაიტანოს სკეპტიკოსი ქვეყნების დედაქალაქში, მას სჭირდება რესურსი და დრო ამაზე სასაუბროდ. მაგრამ მას უწევს საუბარი უამრავ სხვა შიდა პოლიტიკირ საკითხზე, მათ შორის პოლიტიკური ძალადობა და კორცხელი, „რუსთავი-2“-ის საქმე. როცა მთელი რესურსი ამ თემებზე იხარჯება, დიპლომატიას არ რჩება იმის დრო, რომ ისაუბროს ყველაზე მნიშვნელოვან საკითხზე,როგორიც არის ვიზალიბერალიზაცია. ეს პროცესები ხელს უშლის,რომ საქართველო იყოს აღქმული სანდო პარტნიორად სკეპტიკოსი ქვეყნებისთვის,“ – განაცხადა სერგი კაპანაძემ.
მანანა ღოღობერიძე