koba„ძალიან კარგია, რომ „რუსთავი-2“-ის პროცესები შუქდება. მედიისთვის გავხსენით წლების განმავლობაში დახურული სასამართლო სხდომები. ადრე კამერებს სასამართლოს ეზოშიც კი ეკრძალებოდათ შესვლა. ზედმეტია ლაპარაკი სხდომაზე მობილური ტელეფონით შესვლაზე“. ამის შესახებ „ქართული ოცნების“ წევრმა, პარლამენტის ვიცე-სპიკერმა მანანა კობახიძემ ტელეკომპანია „იმედის“ ეთერში, გადაცემა „ქრონიკის სტუდიაში“ ისაუბრა.
„რუსთავი-2“-ის საქმეზე საზოგადოებას ინტენსიურად მიეწოდება ინფორმაცია. მე არ ვიცი დეტალები, მაგრამ თუ ადამიანებს რაღაც დავა აქვთ საკუთრებასთან დაკავშირებით, სხვაგან ვერსად იდავებენ, თუ არა სასამართლოში. უკეთესი იქნებოდა არჩევნებამდე რამე ტიპის გადაწყვეტილება არ მიღებულიყო, მე ამის თქმის უფლებაც არ მაქვს, არ შეიძლება პოზიციები გამოვხატო. როგორც იქცევა ბატონი ნიკა გვარამია, მსგავსი რამ არასოდეს მომისმენია, თუნდაც არ მომწონებოდა ბევრი მოსამართლის ქცევა. ჩემი სურვილია არანაირი კითხვის ნიშნები ამ სასამართლო გადაწყვეტილებებზე არ არსებობდეს.
სასამართლო სისტემა საქართველოში არ არის იდეალური და ვერც იქნება იმ პრობლემებიდან გამომდინარე, რომელშიც იმყოფებოდა მემკვიდრეობით. ძალიან ღია, გამჭვირვალე გახდა იუსტიციის საბჭოს საქმიანობა, ჩართულია არასამთავრობო სექტორი. მნიშვნელოვანია სასამართლო დარბაზების ღიაობა. ეს ზრდის სასამართლოს ანგარიშვალდებულებას სასამართლოს წინაშე, რაც ჩვენი ხელისუფლების მიღწევაა. ზედმეტია ლაპარაკი სხდომაზე მობილური ტელეფონით შესვლაზე.
პარლამენტი აბსოლუტურად გაემიჯნა იუსტიციის საბჭოს, პარლამენტის წევრები აღარ მონაწილეობენ საბჭოს შემადგენლობაში. ჩვენ ეს ბერკეტი თავად ჩამოვიცილეთ. უმრავლესობის წევრები თავად იღებდნენ მონაწილეობას პროცესებში, მაგალითად ნიკა გვარამია თავად იყო იუსტიციის საბჭოს წევრი. ის, რომ მოსამართლეები ლოტოტრონით ავირჩიოთ, არასერიოზულია. აუცილებელია რაღაც მოდელზე შევთანხმდეთ. სასამართლოს თავმჯდომარე არ უნდა წყვეტდეს რომელმა მოსამართლემ რომელი საქმე განიხილოს. დღეს ეს უნდა გამოვრიცხოთ.
რა თქმა უნდა ლევან მურუსიძის მიმართ საზოგადოების განწყობა აშკარაა. ვინც უფრო მეტად გააკრიტიკებს მურუსიძეს, ის მეტად ცდილობს პოლიტიკური ქულის დაწერას. ჩვენ მეტი პასუხისმგებლობა მოგვეთხოვება. პოლიტიკოსის ნებისმიერი განცხადება მოსამართლის მისამართით, შეიძლება აღქმული იქნას სასამართლოზე ზეწოლად,“ – განაცხადა მანანა კობახიძემ.
მანანა ღოღობერიძე
