“ვითიბი ბანკი” და შპს “სილქ როუდ ბიზნეს ცენტრი” რუსთაველის 31-ში მდებარე ყოფილი ფოსტა-ტელეგრაფის შენობაში “Park Inn”-ის ბრენდის სასტუმროს განსათავსებლად კრედიტის გამოყოფის პირობების შესახებ შეთანხმებას ხელს მოაწერენ.
ხელმოწერის ცერემონია ხვალ, სასტუმრო “რადისონ ბლუ ივერიას” Ball Room-ში გიმართება.
მიმდინარე წლის 23 აპრილს შპს “სილქ როუდ ბიზნეს ცენტრმა” და Rezidor Hotels APS Danmark-მა ხელი მოაწერეს ხელშეკრულებას Park Inn-ის რეზიდორ ჯგუფისთვის მართვაში გადაცემის შესახებ.
პროექტის ღირებულება დაახლოებით 22 მილიონ აშშ დოლარს შეადგენს. ამ თანხის მოზიდვა პროექტის მფლობელმა შპს “სილქ როუდ ბიზნეს ცენტრმა” “სილქ როუდ ჯგუფის” ორგანიზებით “ვითიბი ბანკის” მეშვეობით განახორციელა.
სასტუმროში დაახლოებით 200 ნომერი იქნება, რესტორანი, ლობი-ბარი, სპორტული დარბაზი და საუნა. აგრეთვე გათვალისწინებულია საკონფერენციო სივრცეები და ბიზნეს ლაუნჯი.
ამჟამად მიმდინარეობს დაპროექტებაზე და დიზაინზე მუშაობა; პირველადი სამშენებლო სამუშაობის დაწყება იგეგმება 2013 წლის სექტემბერში. ფოსტის შენობის იერსახე მაქსიმალურად იქნება შენარჩუნებული. პროექტი შეთანხმებულია ფოსტის შენობის ორიგინალური პროექტის ერთ-ერთ ავტორთან თეიმურაზ მიქაშავიძესთან, რომელიც ასევე დაეწრება ხელისმოწერის ცერემონიალს.
წინასწარი გეგმებით სასტუმრო პირველ სტუმრებს 2015 წლის მესამე კვარტლიდან მიიღებს. Park Inn-ს ძირითადი უპირატესობა არის მისი საუკეთესო ლოკაცია და ამავე დროს ხელმისაწვდომი ფასები.
Park Inn-ის სასტუმროს პროექტში დაახლოებით 500-მდე ადამიანი დაასაქმდება.
“სილქ როუდ” ჯგუფის ორგანიზებით მოზიდული ინვესტიციების საშუალებით სს “ახალმა სასტუმრომ” 2009 წელს სასტუმრო “რედისონ ბლუ ივერია” გახსნა.
მიმდინარე წელს ვარდების რევოლუციის მოედნის ჩრდილოეთ ნაწილში შპს “ახალი ოფისის” მიერ განთავსდა კაფე-პავილიონი და პარკირების ზონა, კეთილმოეწყო და გამწვანდა მიმდებარე ტერიტორია.
ამჟამად შპს “ახალი ოფისის” მიერ მიმდინარეობს არასაცხოვრებელი დანიშნულების ნაგებობის პროექტირება, რომელიც უნდა განთავსდეს ე.წ. “ანდროპოვის ყურების” ადგილას.
31.07.13
