საქართველოს პრემიერ-მინისტრი, ბიძინა ივანიშვილი რობერტ სტურუას 75 წლის იუბილეს ულოცავს.
“დღეს არა მარტო ქართული, არამედ მსოფლიო კულტურის კალენდარში მნიშვნელოვანი დღეა – 75 წელი შეუსრულდა თანამედროვეობის უდიდეს რეჟისორს – რობერტ სტურუას.
სტურუას თეატრი საბჭოთა წლებში თავისუფლების კუნძული იყო. სტურუას თეატრი იყო პროტესტი, რომელიც ისმოდა განსაკუთრებულად დახვეწილ, სიღრმითა და მაღალი ოსტატობით გამორჩეულ სცენაზე. პროტესტის ეს ხმა, ეს ძალა აღმოჩნდა იმდენად ძლიერი, რომ მისი თეატრი არა მარტო დიდი რეჟისორის სამშობლოში გახდა ადამიანების სულიერი თავშესაფარი, არამედ მან სახელი გაითქვა მთელ მსოფლიოში.
სიკეთე და ბოროტება – ეს არის თემა, რომლის გააზრებაშიც რობერტ სტურუამ, თავისი სპექტაკლებით, უდიდესი როლი შეასრულა.
ჩვენ ვართ უსაზღვროდ მადლიერი იმ მემკვიდრეობისთვის, რომელიც მან შექმნა და ჩვენი კულტურის საგანძურს შეჰმატა. ბედნიერებაა, იყო რობერტ სტურუას თანამედროვე.
დიდი პატივისცემით ვულოცავ ბატონ რობერტს დაბადების დღეს, ვუსურვებ დიდხანს სიცოცხლეს და კიდევ მრავალ შემოქმედებით წარმატებას”, – ნათქვამია ბიძინა ივანიშვილის მილოცვაში.
31.07.13
