„ „ქართული ოცნება“ არის კვირიკაშვილის. ეს ან ასე იქნება, ან „ქართული ოცნება“ საერთოდ არ იქნება კონკურენტუნარიანი. პრემიერი ან გახდება დამოუკიდებელი საკუთარი პარტიით, ან ის გაიზიარებს მისი წინამორბედის ხვედრს“. ამის შესახებ „რესპუბლიკური პარტიის“ ლიდერმა დავით ბერძენიშვილმა „ტვ-პირველზე“, გადაცემა „ინგა გრიგოლიას დღის ამბებში“ ისაუბრა.
„კვირიკაშვილი და მე გვახსენა ერთ კონტექსტში, უკმაყოფილო არ ვარ. ჩვენი პოზიციები პრეზიდენტის ინსტიტუტთან დაკავშირებით იდენტურია. მე პრეზიდენტი გამიკრიტიკებია და დამიცავს, თუმცა პრეზიდენტის ინსტიტუტი არასდროს გამიკრიტიკებია. სიმართლე არის ჩემს მხარეს.
1 ოქტომბერიც 2003 წლის 23 ნოემბერივით მიმკრთალი პოლიტიკური თარიღი რომ არ იყოს, ამისთვის ნამდვილი პოლიტიკური პლურალიზმი უნდა მივიღოთ. „ნაციონალური მოძრაობა“ – ეს არის ქვეყნის წარსული, „ქართული ოცნება“ დღევანდელობა, აწმყო, რომელიც არ მოგვწონს. გვაქვს შანსი,რომ მრავალფეროვანი პარლამენტი ავირჩიოთ იმისთვის, რომ მომავალში არ გადაგვყვეს წარსული და ნაკლებად მიმზიდველი დღევანდელობა.
ძალიან აქტიურდება ივანიშვილი საქართველოში, ისევე,როგორც სააკაშვილი ოდესაში, თავის კარავში. მიდის მტრის ხატის შექმნის პოლიტიკა. მათ მიერ შექმნილი ორგანიზაციების რეიტინგული ჯამი უკეთეს შემთხვევაში არის ნახევარი. საქართველოში 6-7 კონკურენტუნარიანი პოლიტიკური სუბიექტია. მათ ებღაუჭება ძველი და დღევანდელი ხელისუფლების დამაარსებლები. თუმცა ისინი არ არიან არა მხოლოდ ფორმალური ხელისუფლები, ისინი არ არიან ორიენტირები. ივანიშვილი იყო 2012 წლის პირველი ოქტომბრის შემოქმედი და მორჩა,“ – განაცხადა დავით ბერძენიშვილმა.
მანანა ღოღობერიძე