„ყველას გვქონდა ამ გადაწყვეტილების მოლოდინი, მით უმეტეს „კაბელების საქმის“ შემდეგ,როდესაც ივანიშვილმა ხუთი უდანაშაულო ადამიანი ციხეში გაუშვა. ბუნებრივია ჩნდება კითხვის ნიშანი, რომ ეს წინასაარჩევნოდ დაგეგმილი პოლიტიკური აქტია“. „რუსთავი-2“-ის საქმესთან დაკავშირებით სააპელაციო სასამართლოს გადაწყვეტილების შესახებ პარტია „თავისუფალი დემოკრატების“ ლიდერმა ირაკლი ალასანიამ „რუსთავი-2“-ზე, გადაცემა „შაბათის კურიერში“ ისაუბრა.
„ ველოდი სააპელაციო სასამართლოს მხრიდან ამ განაჩენს, სამწუხაროა, რომ 25 წლიანი დამოუკიდებლობის შემდეგ კვლავ კითხვის ნიშნის ქვეშ დგას სასამართლოს დამოუკიდებლობა. ვერ ვისწავლეთ საკუთარი წარსულიდან. ყველა მოდის დემოკრატიული ღირებულებების დეკლარირებით და შემდეგ იწყებს ხელისუფლების უზურპირებას. რა თქმა უნდა სასამართლო დავა შემდეგ ინსტანციებში უნდა გაგრძელდეს, მაგრამ ერთადერთი გზა არის ის, რომ ბიძინა ივანიშვილს აღარ ჰქონდეს უმრავლესობაზე გავლენა. ეს ადამიანი და მისი გუნდი ღირებულებებით აცდენილია საქართველოს მომავალს. ეს ხელისუფლება უმცირესობაში უნდა მოვაქციოთ 2016 წელს.
თუ სააკაშვილი უხეშად ერეოდა, ივანიშვილი „რბილ ძალას“ იყენებს და ამას სასამართლოს ხელით აკეთებს. ინსტრუმენტები სააკაშვილისგან გადმოიბარა და ამბობს, რომ არაფერ შუაშია,“ – განაცხადა ირაკლი ალასანიამ.
მანანა ღოღობერიძე
