საქართველოს ეროვნული ბანკის პრეზიდენტს, კობა გვენეტაძესა და საბანკო სექტორის წარმომადგენლებს შორის შეხვედრა გაიმართა. საუბარი ძირითადად ეხებოდა საქართველოში არსებულ ზოგად ეკონომიკურ მდგომარეობას, ძირითად პრობლემებს და ამ პრობლემების გადაჭრის კონკრეტულ გზებს.
შეხვედრასთან დაკავშირებით, კობა გვენეტაძემ განაცხადა: „ეს იყო პირველი ოფიციალური შეხვედრა კომერციული ბანკების წარმომადგენლებთან. რამდენიმე პრიორიტეტულ თემაზე ვისაუბრეთ: პირველი, ესაა ლარიზაციის საკითხი. როგორც მოგეხსენებათ, საქართველოში საკმაოდ მაღალია დოლარიზაცია და ჩვენ აქტიურად ვმუშაობთ იმისათვის, რომ შევამციროთ ეს მაჩვენებელი. ჩვენი ამოცანაა, რომ რაც შეიძლება მეტად ხელმისაწვდომი გავხადოთ ქვეყანაში გრძელვადიანი ლარის სესხები”.
გვენეტაძემ ასევე ყურადღება გაამახვილა მომხმარებელთა უფლებების დაცვის გაძლიერებაზე: „ვფიქრობთ, მომხმარებელთა უფლებების დაცვა მნიშვნელოვანია კომერციული ბანკებისთვისაც, რადგან რაც უფრო მეტი კმაყოფილი მსესხებელი ეყოლებათ ბანკებს, მით უფრო მაღალი იქნება მათ მიმართ ნდობა. ჩვენი მიდგომაა, რომ ბანკები უფრო მეტად გახსნილები იყვნენ, უფრო მეტი ინფორმაცია მიაწოდონ თავიანთ მომხმარებლებს. ასევე, ვგეგმავთ ცვლილებები შევიტანოთ წესში, რომელიც მომხმარებლისათვის აუცილებელი ინფორმაციის მიწოდებას ითვალისწინებს”.
მარიამ ტაკაშვილი
