„გერმანია ჩვენთვის ხდება არა მხოლოდ მეგობარი, არამედ ლოკომოტივი,რომელიც მოახდენს გავლენას ევროკავშირისა და „ნატო“-ს გადაწყვეტილებებზე. გერმანია მაქსიმალურად ეცდება საქართველოსთვის ვიზალიბერალიზაცია დააჩქაროს.ჩვენ უნდა გვქონდეს მოლოდინი,რომ სექტებერში ევროპარლამენტი მხარს დაუჭერს ვიზალიბერალიზაციას“. გერმანიაში გიორგი კვირიკაშვილის ვიზიტზე და ვიზალიბერალიზაიის პროცესის ძირითად ასპექტებზე პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა „ტვ-პირველზე“, გადაცემა „რვიანის“ ეთერში ისაუბრა.
„გერმანია ერთ-ერთი ყველაზე წარმატებული ქვეყანაა ევროპაში და თავისი შესაძლებლობებით, პოლიტიკური ფაქტორის გათვალისწინებით ერთ-ერთ წამყვან როლს ასრულებს ევროკავშრსა და „ნატო“-ში. გერმანიის პოზიციები მნიშვნელოვნად განაპირობებს ჩვენს ევროატლანტიკურ ინტეგრაციას. მისი ეს განცხადებები არის კარგი სიგნალი, მათ შორის ინვესტიციების კუთხით.
გერმანიას როგორც წესი არ სჩვევია სხვა ქვეყნის ქება, მაგრამ ანგელა მერკელმა ხაზი გაუსვა საქართველოს წარმატებებს, ეკონომიკურ რეფორმებს, პროგრესს. მან თქვა, რომ საქართველომ დააკმაყოფილა ყველა კრიტერიუმი. არ არსებობს დამატებითი კითხვები იგივე კრიმინალთან დაკავშირებით. შეჩერების მექანიზმი უკავშირდება არა საქართველოს, არამედ მთლინაად მსოფლიოს. აქ საუბარია ზოგად საერთო პრიციპებზე, კრიზისების მართვის მექანიზმზე. თუ რომელიმე ქვეყნიდან იმატებს მიგრანტთა რაოდენობა,რომლებიცმოითხოვენ პოლიტიკურ თავშესაფარს, რომელიც ხარჯებთანაა დაკავშირებული, შესაძლებელია რომელიმე ევროპულმა ქვეყანამ ეს მექანიზმი აამოქმედოს და შეაჩეროს უვიზო მიმოსვლა გარკვეული ვადით.
ჩვენ არ გვაქვს მოლოდინი, რომ ვიზალიბერალიზაციის მიღწევის შემდეგ საქართველოს მოქალაქეები მიაწყდებიან ევროპას პოლიტიკური თავშესაფრის მოთხოვნით. ამის წინაპირობები არ არსებობს და გერმანია კარგად ხედავს. მთავარი ფაქტორები შეჩერების მექანიზმის ამოქმედებისთვის, არის სირიის პრობლემა, თურქეთში მიგრანტების პრობლემა და უკრაინის მიერ ვალდებულებების არშესრულების მოცემულობა.
ჩვენსა და გერმანიის ურთიერთობებს შორის 2008 წლის შემდეგ იყო ერთგვარი ყინული და სკეპტიკოსი ქვეყნების სიაში იყო შეყვანილი. ჩვენ მოვახერხეთ და გერმანიასთან არა მხოლოდ ყინული გავალღვეთ, გადავედით კარგ პარტნიორულ ურთიერთობაზე. ტერმინი სკეპტიკოსი წინა ხელისუფლებამ დაამკვიდრა და ეს იყო შეცდომა საერთაშორისო ურთიერთობებში. ამ ტერმინით საქართველომ ურთიერთობა გაიფუჭა გერმანიასთან. ჩვენ გვყავს გამოკვეთილად მხარდამჭერი ქვეყნები, თუმცა არსებობენ პრაგმატული ქვეყნებიც, რომლებსაც სკეპტიკოსებს ვერ ვუწოდებ,“ -განაცხადა ირაკლი სესიაშვილმა.
მანანა ღოღობერიძე
