„კარგია, რომ ანგელა მერკელმა გააკეთა ოპტიმისტური განცხადებები საქართველოსთან მიმართებაში. გერმანიას აქვს სერიოზული თანადგომა, აქ ორი აზრი არ არის. იმედი მაქვს არჩევნებამდე სანდოობას არ დაკარგავენ“. გერმანიაში პრემიერ-მინისტრის ვიზიტის დეტალებზე და ანგელა მერკელის განცხადების შესახებ პარტია „თავისუფალი დემოკრატების“ წევრმა ვიქტორ დოლიძემ „ტვ-პირველზე“, გადაცემა „რვიანის“ ეთერში ისაუბრა.
„გერმანაიაში ვიზიტისთვის სწორი დრო შეირჩა. კარგია,რომ გიორგი კვირიკაშვილი დღეს არის ბერლინში. ეს ადასტურებს ევროკომისიის დასკვნას, რომ საქართველომ ყველა პარამეტრი დააკმაყოფილა და რჩება მხოლოდ პოლიტიკური გადაწყვეტილების ჯერი. დღეს ვითარება ევროპაში არ არის მარტივი და ეს გასაგებია, თუმცა მეორე მხარეა,რომ არ შეიძლება საქართველო ერთ პაკეტში იქნას განხილული სხვა ქვეყნებთან ერთად. საჭიროა ინდივიდუალური მიდგომა.
სკეპტიკოსს როდესაც ვამბობთ, ვგულისხმობთ ნაკლებად ოპტიმისტურს. გერმანიის სპეციფიკაა, რომ იქ არის წინასაარჩევნო წელი და გასაგებია,რომ პრაგმატული დამოკიდებულება აქვთ შიდა პოლიტიკური პრინციპების დასაცავად. გერმანიამ უარიც რომ თქვას, ეს ხელს არ გვიშლის. ევროკავშირის ე.წ შენგენის ქვეყნების უმრავლესობა თუ დადებით გადაწყვეტილებას მიიღებს, ეს პრობლემა გადაიჭრება.
ჩვენ უნდა გავაძლიეროთ ორმხრივი და მრავალმხრივი ფორმატების შეხვედრები სხვა ქვეყნებთანაც. რა თქმა უნდა არ უნდა დაიძაბოს წინასაარჩევნო ვითარება, არ უნდა განმეორდეს ზუგდიდის მსგავსი ცემა-ტყეპა, არ უნდა მივადგეთ თავისუფალ მედიას და სასამართლო უნდა იყოს დამოუკიდებელი,“ – განაცხადა ვიქტორ დოლიძემ.
მანანა ღოღობერიძე
