„ჩვენ რა თქმა უნდა ვერ გადავუხვევთ აღებული კურსიდან. თანმიმდევრულად უნდა ვიაროთ გეგმის მიხედვით.ეს პროცესი არ იქნება პრობლემური ფაქტორი საქართველოსთვის“. დიდი ბრიტანეთის ევროკავშირიდან გასვლის გადაწყვეტილების შესახებ და პროცესის გავლენაზე საქართველოსთან მიმართებაში საგარეო საქმეთა მინისტრის მოადგილემ დავით ზალკალიანმა „GDS“-ზე, გადაცემა „2030“-ის ეთერში ისაუბრა.
„დასანანია, რომ ბრიტანეთმა მსგავსი გადაწყვეტილება მიიღო. ბუნებრივია ამ პროცესს ექნება „შოკის ეფექტი“ ბრიტანეთის შიგნით. გასათვალისწიებელია ეკონომიკური ფაქტორის გაანალიზება. მე ვფიქრობ, რომ ეს არის დემოკრატიული გადაწყვეტილება, ბრიტანელი ხალხის სუვერენული არჩევანი და ყველა სხვა სახელმწიფომ პატივი უნდა სცეს ამ სურვილს. ამ სიტუაციიდან კიდევ უფრო გაძლიერებული უნდა გამოვიდეს ევროკავშირი.
ნაადრევია ევროსკეპტიკოსების საუბარი, თითქოს დასრულდა ევროკავშირი და პერსპექტივა არ აქვს. სწორედ ახლა არის დრო, რომ ყველა წევრი ქვეყანა გაერთიანდეს და მოხდეს კონსოლიდაცია. სიტუაციიდან ერთადერთი გამოსავალი არის მათი ერთიანობა. რუსეთი ეცდება გააძლიეროს ევროსკეპტიკური განწყობები, მაგრამ ამას ევროკაშირმა უნდა დაუკავშიროს კონსოლიდირებული პოზიცია. ოპტიმიზმის საფუძველს მაძლევს პირველი რეაქციები. ისინი აუცილებლად დაგეგმავენ იმ ნაბიჯებს, რამაც უნდა გააძლიეროს ევროკავშირი.
ჩვენი საელჩოებიც ჩართული იყო იმ პროცესის ანალიზში, რომელიც წინ უძღოდა რეფერენდუმის ჩატარებას. ჩვენთვის მნიშვნელოვანია ეს პროცესები, რადგან ევროკავშირი არის საქართველოს ახლო პარტნიორი ორგანიზაცია. მივდივართ ვიზალიბერალიზაციის დასკვნით ეტაპამდე. ფაქტი, რომ ყველა ვალდებულება შევასრულეთ, აღიარებულია. ჩვენ ერთი წუთიც არ მოვდუნებულვართ. 24 საათის განმავლობაში ჩვენი დიპლომტიური კორპუსი არის მუდმივი კომუნიკაციის რეჟიმში ევროპელ პარტნიორებთან. ეს აუცილებლად მოიტანს დადებით შედეგს. ამ მიმართულებით არანაირი საფრთხე არ არსებობს,“ – განაცხადა დავით ზალკალიანმა.
მანანა ღოღობერიძე
