„ბუნებრივია ევროკავშირს უახლოეს მომავალში არ ეცლება სხვა პრობლემებისთვის, სხვა ქვეყნების სამეზობლო ინიციატივებისთვის, თუნდაც საქართველოსა და უკრაინის ვიზალიბერალიზაციისა და დაახლოებისთვის. მგონი საქართველო არის ერთადერთი ქვეყანა,რომელიც ასე ოპტიმისტურად უყურებს ევროკავშირიდან ბრიტანეთის გასვლას“. ამის შესახებ „გაერთიანებული დემოკრატიული მოძრაობის“ ლიდერმა ნინო ბურჯანაძემ „GDS“-ზე, გადაცემა „2030“-ის ეთერში ისაუბრა.
„ბრიტანეთში ჩატარებული რეფერენდუმი შეცვლის არა მარტო დიდი ბრიტანეთის, არამედ ევროკავშირის ბედსაც. შესაბამისად შეიცვლება იმ სახელმწიფოების ბედიც,რომლებიც ევროკავშირს უკავშირებენ მომავალს, მათ შორის არის საქართველო. ეს პროცესი ზეგავლენას მოახდენს მთლიანად მსოფლიო პოლიტიკასა და ეკონომიკაზე. ევროკავშირი სერიოზული გამოწვევის წინაშე დადგა. ამას არ უარყოფენ არც ევროპელი ლიდერები.
ახლა ევროკავშირს რეალურად თვითგადარჩენის პრობლემა დაუდგა. ჩეხეთმაც გამოაცხადა,რომ შეიძლება რეფერენდუმი ჩატარდეს. შვედეთმა, დანიამ, ნიდერლანდებმა ასევე გამოაცხადეს, რომ ჩატარდება რეფერენდუმი. საფრანგეთში ავტორიტეტული ორგანიზაციის ლიდერმა მარი ლეპენმა აღიარა, რომ საფრანგეთი უნდა გავიდეს ევროკავშირიდან და მას რეალურად არჩევნებზე მოგების შანსი აქვს.
მთლიანად გადაიხედება მთელი ევროპული არქიტექტურა. მნიშვნელოვანია,რომ ევროპის ლიდერებმა შეაჩერონ ეს პროცესი. ბრიტანეთის გადაწყვეტილება შეიძლება ჯაჭვური რეაქციის დასაწყისი აღმოჩნდეს. ასეთ შემთხვევაში ეს იქნება ევროკავშირის კრახი. მიმდინარე პროცესები არის ბოლო პერიოდში ევროპელი ლიდერების მცდარი პოლიტიკის შედეგი. ევროკაშირმა არაერთ შემთხვვაში საკუთარ ინტერესებზე მაღლა აშშ-ის ინტერესები დააყენა. ევროპა დადგა მიგრანტთა კრიზისის წინაშე. ისინი ნამდვილად არიან დემოკრატიულები, სტუმართმოყვარეები, მაგრამ არსებობს რაღაც ლიმიტი, შესაძლებლობა. ხშირად მიგრანტების კულტურა განსხვავდება ევროპული კულტურისგან და მათ არ აქვთ ევროპული ცხოვრების წესში ინტეგრაციის სურვილი. ამან გამოიწვია ევროპელი მოსახლეობის შეშფოთება და სკეპტიციზმი ევროკავშირის ლიდერების მიმართ. ახლა მათ უნდა გააკეთონ ყველაფერი იმისათვის,რომ პირველ ადგილზე დააყენონ ევროპული ინტერესები.
გავოცდი როცა მოვისმინე ქართველი პოლიტიკოსების განცხადებები. მათ შორის პრემიერ-მინისტრმა თქვა,რომ ეს რეფერენდუმი ვერ შეცვლის ვერაფერს და ევროკავშირის სიმტკიცე კიდევ უფრო გაიზრდება. პრობლემები რა თქმა უნდა იქნება და ჩვენზეც იქონიებს გავლენას. მე ადრეც ვამბობდი,რომ ვერ ვხეავ საქართველოსთვის ვიზალიბერალიზაციის შესაძლებლობას. ახლა ამის კიდევ უფრო ნაკლებ შანსს ვხედავ. რა იქნება ათი წლის შემდეგ, არავინ იცის. ევროკავშირთან დაახლოება გაძნელდება ნამდვილად იმიტომ,რომ ევროპას ახალი თავისტკივილი გაუჩნდა.რა თქმა უნდა ჩვენ უნდა გავაგრძელოთ თანამშრომლობა, თუმცა უნდა ვიცოდეთ რეალურად რა შანსები გვაქვს. ეს ხელს შეუწყობს რუსეთის პოზიციების გაძლიერებასაც. სანქცები მის მიმართ შესუსტდება,“ – განაცხადა ნინო ბურჯანაძემ.
მანანა ღოღობერიძე
