თურქეთის საგანგებო და სრულუფლებიანი ელჩის ბეირუთში ინან ოზილდიზის განცხადებით ლიბანის დედაქალაქ ბეირუთში თურქეთის საჰაერო ფლოტის ორი თურქი თანამშრომელი 9 აგვისტოს დილით ადრე აეროპორტიდან გაიტაცეს.
ეს ფაქტი დაამტკიცა ლიბანის შინაგან საქმეთა მინისტრმა მერვან სარბელმაც, რომლის თქმითაც 6 თურქი პილოტი აეროპორტიდან სასტუმროში მიდიოდა და ბეირუთის კოკოდის ხიდთან ისინი გააჩერეს უცნობმა პირებმა და ამ 6 პილოტიდან 2 გაიტაცეს.
როგორც თურქეთის ელჩმა ბეირუთში ინან ოზილდიზმა განაცხადა, იგი პირადად შეხვდა ლიბანის შინაგან საქმეთა მინისტრ მერვან შერბელს და განიხილეს გუშინწინ ბეირუთის აეროპორტიდან ორი თურქი პილოტის გატაცების საკითხი.
შერბელის თქმით მათ ჯერ ჯერობით ზუსტად არ იციან თურქი პილოტების ადგილსამყოფელი, მაგრამ ისინი კარგად უნდა იყვნენ და შეიძლება გამტაცებლებს ისინი ბეირუთის რომელიმე გარეუბანში ჰყავთ გამოკეტილი. მანვე იმედი გამოთქვა რომ, უახლოეს დღეებში შესძლებენ ორივე პილოტის განთავისუფლებას.
თურქი დიპლომატი შეხვდა ასევე ლიბანის ექსპრემიერ ფუად სინიორასაც და მისგანაც დახმარება ითხოვა. ამ უკანასკნელის აზრით კი გამტაცებლები და მათ უკან მდგომნი ცდილობენ თურქეთ-ლიბანის კეთილი ურთიერთობების დაძაბვას, მაგრამ ამას ვერ მიაღწევენ.
უკვე დადგენილია რომ, გამტაცებლები ისლამური დაჯგუფების წევრები არიან და თურქი პილოტების სანაცვლოდ სირიის ხელისუფლებისგან 9 დაკავებული ლიბანელის განთავისუფლებას ითხოვენ.
ლიბანელმა სამართალდამცავებმა ფაქტთან დაკავშირებით სისხლის სამართლის საქმე გახსნეს და 24 საათიან რეჟიმში მუშაობენ გატაცებულების ადგილსამყოფელის დასადგენად და გასანთავისუფლებლად.
თურქეთის საგარეო საქმეთა სამინისტრომ ლიბანში ორი თურქი პილოტის გატაცების ფაქტთან დაკავშირებით ოფიციალური განცხადება გაავრცელა, რომელშიც მკაცრად დაგმო გატაცების ფაქტი და ამასთან ერთად ლიბანში მყოფ თურქ მოქალაქეებს, უკან დაბრუნება მოსთხოვა.
ამავე განცხადებაში თურქ მოქალაქეებს აფრთხილებენ რომ, უახლოეს დღეებში თუ რაიმე აუცილებლობა არ ექნებათ, თავი შეიკავონ ლიბანში ჩასვლისაგან.
13.08.13
