შეგმიჩნევიათ ქუჩებში მოხატული ქოლგებით მოსიარულე ადამიანები? ქოლგები სვანური კოშკებით, პატარა უფლისწულით, ფიროსმანის ნახატებითა და ქართული ანბანით – ყველა მათგანს „აი რა“ აერთიანებს.
ორი მეგობრის მიერ შექმნილი ქოლგები სოციალურ ქსელში დიდი პოპულარობით სარგებლობს. მათ ფეისბუკ გვერდზე, პროდუქციის შეკვეთა-შეძენის გარდა, ბევრ სახალისო და საინტერესო ინფორმაციას გაეცნობით წვიმის შესახებ.
კატო ჯავახიშვილი და ნინო განუგრავა ყველაზე წვიმიან ამინდშიც კი ყველაზე პოზიტიურ განწყობას გვპირდებიან. „თბილისი თაიმსი“ „აი რას“ იდეის შექმნისა და სხვა დეტალების შესახებ ორ მეგობარს ესაუბრა.
თქვენი ბიზნეს საქმიანობის შესახებ გვიამბეთ, საიდან გაჩნდა იდეა შეგექმნათ მოხატული ქოლგები, იყო ამის პრეცედენტი საქართველოში?
– კატო ჯავახიშვილი: იდეა,დაახლოებით, ორი წლის წინ, მე და ნინოს გაგვიჩნდა, ოღონდ ცოტა სხვა ფორმით. თავიდან საუბარი იყო პრინტზე… რაღაც პერიოდი ვარკვევდით შესაბამის ქარხნებთან, როგორ შეიძლებოდა ამის მოხერხება, მაგრამ ვერ შევთანხმდით, რადგან ჯერ ერთი პროდუქცია საკმაოდ ძვირი ჯდებოდა და მეორეც – მხოლოდ ცალკეული ნაწილების დაფარვა ხდებოდა საღებავით.
– ნინო განუგრავა: რაღაცნაირად ლოგიკურად მივედით იმ აზრამდე, რომ ქოლგები მოგვეხატა ხელით და ეს ყოფილიყო ქართული არტი, რისი პრეცედენტი საქართველოში არ ყოფილა. თანაც მე სულ მხატვრების წრეში ვტრიალებ, ჩემი მეუღლე ზალიკო სულაკაურია, რამაც ძალიან გაგვიადვილა საქმის წამოწყება. გავაკეთეთ ბევრი ნიმუში, მოვიძიეთ თერმული დამუშავების სახეობები, რომ საღებავი არ გადასულიყო და დავიწყეთ.
რატომ უნდა შეუკვეთოს მომხარებელმა თქვენთა ქოლგა, რა არის თქვენი ძირითადი უპირატესობა?
– ინო განუგრავა: თუნდაც იმიტომ, რომ ერთმანეთს უთხრან: გილოცავ, წვიმას.
– კატო ჯავახიშვილი: თუნდაც იმიტომ, რომ ეს არის ინოვაცია დღევანდელი სივრცისთვის, ან თუნდაც იმიტომ რომ ეს არის ქართული კულტურის პოპულარიცაზია და საზოგადოებისთვის კიდევ ერთხელ იმის შეხსენება, რომ არავიზე ნაკლები მწერლები და მხატვრები არ გვყავს და ამის ყველა საგანში და ნივთში გამოყენება შეგვიძლია.
რატომ „აი რა“ ? რას გვეუბნება სახელი?
– ნინო განუგრავა: დაახლოებით, ამას – „აი, რა გვინდა გითხრათ“… ან, ალბათ გახსოვთ, ბესიკის ლექსზე შექმნილი მანანა მენაბდის ფანტასტიკური სიმღერა „საბრალო აი რა“, – ამიტომაც, და კიდევ რამდენიმე რამის გამო, რისი თქმაც ქართული არტით გვინდა თქვენთვის…
როგორია ფასები და რამდენად აქტიურები არიან უცხოელი მომხმარებლები?
– ნინო განუგრავა: ქართველების შეკვეთებში ძირითადად პატარა პრინცი ლიდერობს, რაც თავისთავად ცუდი სულაც არაა, მაგრამ ვისურვებდი უფრო მეტი ქართული ანბანი დამენახა ქართველი მომხმარებლის ხელში.
– კატო ჯავახიშვილი: ძალიან ხელმისაწვდომი ფასები გვაქვს. ვითვალისწინებთ დღევანდელ ეკონომიურ მდგომარეობას და მიუხედავად იმისა, რომ სამუშაო პროცესი საკმაოდ შრომატევადია, ქოლგების ფასები 35-65 ლარის ფარგლებში მერყეობს, ხარისხის და ნახატის სირთულის მიხედვით. რაც შეეხებათ უცხოელებს, გულდასაწყვეტია ის, რომ უცხოელები უფრო მეტად არიან დაინტერესებული ქართული კულტურის ექსპონატებით, ვიდრე ქართველები.
როგორია თქვენი სამომავლო გეგმები და სად შეუძლია მომხარებელს პროდუქციის შეძენა?
– ნინო განუგრავა: სამომავლოდ ვფიქრობთ საწვიმარებზე და გადასვლას და ქსელის გაფართოვებას. ამ ეტაპზე მაღაზია არ გვაქვს და მომხმარებელს ჩვენი პროდუქციის შეძენა ფეისბუქის გვერდის საშუალებით შეუძლია, თუმცა, ვიმედოვნებთ, რომ ძალიან მალე გვექნება მაღაზია, სადაც გარდა ამ პროდუქციისა, სხვა ბევრი საინტერესო ნივთი იქნება, რა თქმა უნდა ძირითადად საქართველოზე.
ნათია კეკენაძე
