„უბლოკო სტატუსი ნიშნავს საქართველოს უარს ნებისმიერ სამხედრო ორგანიზაციაში გაწევრიანებაზე, იქნება ეს „ ნატო“ თუ რომელიმე სხვა ორგანიზაცია. მე ვფიქრობ ეს არის ერთადერთი გამოსავალი. ჩვენ აღარ ვართ ქვეყანა, ჩვენ ვართ უბრალოდ ტერიტორია, რომელიც ინერციით მიდის. მე ნამდვილად მინდა, რომ საქართველო იყოს ქვეყანა,რომელსაც პატივს სცემენ“. საკონსტიტუციო ცვლილების ინიციატივაზე, ეუთოს საპარლამენტო ასამბლეის ვიზიტზე და პრეზიდენტის პოსტზე გიგი წერეთლის კანდიდატურის შესახებ „ დემოკრატიული მოძრაობის“ ლიდერმა ნინო ბურჯანაძემ „GDS“-ზე, გადაცემა „2030“-ს ეთერში ისაუბრა.
„კონსტიტუცაში ქვეყნის უბლოკო სტატუსის მითითება მნიშვნელოვანია და დარწმუნებული ვარ ხალხი ამას მხარს დაუჭერს. ჩვენ ვაპირებთ, რომ შემოვიაროთ მთელი საქართველო და საარჩევნო კამპანიასთან ერთად ხალხს ავუხსნათ რას ნიშნავს უბლოკო სტატუსი, რას მოუტანს ეს საქართველოს. არ უნდა გავწევრიანდეთ არც იმ ორგანიზაციაში რომელიც რუსეთს არ მოსწონს და არც იმ ორგანიზაციაში,რომელიც მოსწონს. ეს ინიციატივა არის საქართველოს რეალური მშვიდობის, სტაბილურობის და ეკონომიკური აღმავლობის წინაპირობა. ეს არ არის რუსეთის ინტერესი. მან კარგად იცის რომ ჩვენ „ნატო“-ში არავინ მიგვიღებს და გაწევრიანების არანაირი შანსი არ გვაქვს. რუსეთი თავის ჯარს მხოლოდ იმ შემთხევვაში გაიყვანს, თუ იქნება დარწმუნებული, რომ საქართველოსგან საფრთხე არ ემუქრება. თუ საქართველოში იქნება ისეთი ხელისუფლება,რომელიც მხოლოდ ქვეყნის ინტერესებით იხელმძღვანელებს და არა ამერიკის შეერთებული შტატების, ან „ნატო“-ს ინტერესებით, რუსეთთან ურთიერთობა გაადვილდება. ჩვენ უნდა ვიყოთ მშვიდობის და სტაბილურობის გარანტი კავკასიაში, დამოუკიდებელი ინტერესების მქონე სახელმწიფო და არა დაპირისპირების პოლიგონი ორ სუპერ-სახელმწიფოს შორის.
ეუთოს საპარლამენტო ასამბლეის მასპინძლობა მნიშვნელოვანი მოვლენაა საქართველოსთვის. ყოველწლიურად შეხვედრა რიგითობის მიხედვით სხვადასხვა ქვეყანაში იმართება და ამჯერად ეს ღონისძიება საქართველოში ტარდება. ეს არის შესაძლებლობა ,რომ ეუთოს ყველა წევრი ქვეყნის პარლამენტარი ჩამოვიდეს, გაეცნოს საქართველოს, თავისი თვალით ნახოს ეს ქვეყანა და იმუშავოს ჩვენს პირობებში. გაცილებით მნიშვნელოვანია თუ რა პოლიტიკური პროცესები წარიმართება ამ შეხვედრის დროს, რა დეკლარაციას მიიღებენ.
თბილისში რუსეთის დელეგაციაც არის ჩამოსული. ამ შემთხევვაშისაქართველო საერთაშორისო ორგანიზაციას მასპინძლობს და ჩვენი მხრიდან იქნებოდა აბსოლუტურად სულელური და არადიპლომატიური ნაბიჯი, რომ რუსეთის დელეგაციისათვის ხელი შეგვეშალა. საქართველოს ხელისუფლება რომ უფრო მეტად გონიერი ყოფილიყო, დელეგაცია უფრო მაღალი დონითაც იქნებოდა წარმოდგენილი.
მე დიდი გამოცდილება მაქვს ეუთოს საპარლამენტო ასამბლეაში მუშაობის, პრაქტიკულად 12 წელი ვმუშაობდი ვიცე-პრეზიდენტის რანგში და ჩემი მონაწილეობით ათობით დოკუმენტი იქნა მიღებული,სადაც ასახული იქნა საქართველოს ყველა მტკივნეული და მნიშვნელოვანი პრობლემა. რაც შეეხება გიგი წერეთლის კანდიდატურას, მნიშვნელოვანია, რომ ასამბლეაში რუსეთის პარლამენტის წევრებიც არიან და მათ პრეზიდენტის მნიშვნელოვან პოსტზე ქართველს დაუჭირეს მხარი .
აქ არ აქვს მნიშვნელობა გვარს და სახელს თუ ვინ არის დასახელებული, პრინციპულად მიუღებელია, რომ ეს კანდიდატი არის „ნაციონალური მოძრაობის“ ერთ-ერთი ლიდერი და წარსულის გათვალისწინებით არანაირი მორალური უფლება არ აქვს ადამიანის უფლებების დაცვაზე, დემოკრატიულ პრინციპებზე, თავისუფალ შეკრებებზე ისაუბროს. „ნაციონალური მოძრაობა“ რომ თავხედია გასაგებია, მაგრამ ეს არის „ქართული ოცნების“ უუნარობის ბრალი. რამდენიც არ უნდა თქვან, რომ მხარს არ უჭერენ გიგი წერეთელს, ეს არის უსუსური პოზიცია. ოთხი წლის განმავლობაში ვერ შეძლეს რომ ეუთოს გაეგო რას წარმოადგენს „ნაციონალური მოძრაობა“. ეს არის დამნაშავე ორგანიზაცია და საერთოდ პოლიტიკაში ყოფნის უფლება არ აქვს“-განაცხადა ნინო ბურჯანაძემ.
მანანა ღოღობერიძე
