„ჩვენი უშიშროების სამსახურები აქტიურად თანამშრომლობენ როგორც თურქულ სამსახურებთან, ასევე ჩვენს პარტნიორებთან, მათ შორის ამერიკის შეერთებულ შტატებთან. ამ ეტაპზე ტერაქტში ჩატაევის მონაწილეობა არ დასტურდება. თუმცა გამოძიება რა შედეგებამდე მივა, მერე ვილაპარაკოთ“. აჰმედ ჩატაევის შესაძლო კავშირზე თურქეთში მომხდარ ტერაქტთან, ლაფანყურის სპეცოპერაციის გაუხმაურებელ დეტალებზე და ჩატაევისა და მიხეილ სააკაშვილის საიდუმლო კავშირებზე საპარლამენტო უმრავლესობის წევრმა, თავდაცვისა და უშიშროების კომიტეტის თავმჯდომარე ირაკლი სესიაშვილმა „რუსთავი-2“-ზე, გადაცემა „შაბათის კურიერის“ ეთერში ისაუბრა.
“დღეს მოვისმინე ბევრი ტყუილი. როგორც ჩანს ბატონი სააკაშვილი ფორმაშია. აჰმედ ჩატაევი იყო წინა ხელისუფლების უშიშროების აგენტი. ის სააკაშვილსგან გიორგი ლორთქიფანიძის საშუალებით იღებდა დავალებებს. მას ჰქონდა საქართველოს მოქალაქის ოპერატიული პასპორტი, მიდიოდა მივლინებებში, იღებდა ხელფასს და მუშაობდა სააკაშვილზე. ჩატაევი უკრაინაში დააკავეს და მაშინ საქართველოს ხელისუფლებამ გადაწყვიტა ამ პირის გამოყენება სხვადასხვა მიზნისთვის. მას უცებ შეუკერეს საქმე, დააბრალეს, თითქოს ვიღაც მოკლა. მაშინ როდესაც მტკიცდებოდა, რომ ის საქართველოში არ ყოფილა. ექსტრადაცია მოხდა რამდენიე საათში. შემდეგ მოუხსნეს სისხლის სამართლებრივი პასუხისმგებლობა და გახდა უშიშროების აგენტი. ლაფანყურის დაგეგმილი საქმე ჩაუვარდათ და შემდეგ ჩვენმა სპეც-სამსახურებმა ესროლეს ჩატაევს. სავარაუდოდ მისი ლიკვიდაცია სურდათ,რადგან ჩატაევმა ძალიან ბევრი რამე იცოდა. თუმცა გადარჩა, ფეხში იყო დაჭრილი და 9 დღეში გამოვიდა ტყიდან. ჩაბარდა მესაზღვრეებს და იმედი ჰქონდა,რომ როგორც ყოფილ აგენტს, მას ანგარიშს გაუწევდნენ. ამის შემდეგ მას უდებენ ორ „ლიმონკას“, სდებენ ბრალს არა ტერორიზმის, არამედ უკანონო იარაღის შენახვის ბრალდებით.
დამტკიცდა, რომ პირს ეს იარაღი ჩაუდეს და შესაბამისი მტკიცებულებების არარსებობის გამო სასამართლომ მიიღო ის გადაწყვეტილება, რაც მიიღო. ჩვენმა პროკურატურამ ის ატარა დაკითხვებზე, თუმცა როგორც ჩანს ერთგული დარჩა სააკაშვილის და ლორთქიფანიძის და არ ითანამშრომლა ჩვენთან. მან ძალიან ბევრი რამე იცოდა და ამიტომ არ სურდა სააკაშვილს მისი განთავისუფლება.
არანაირი კავშირი თურქეთში მომხდარ ტერაქტთან მას არ აქვს. სააკაშვილმა ილოცოს,რომ ჩატაევი არ იყოს ამ საქმეში გარეული. მასაც მოუწევს დაკითხვაზე მისვლა. საკითხავია კიდევ რა დავალებებს აძლევდა სააკაშვილი და უშიშროების სამსახურები ჩატაევს. ეს არის მორიგი ბინძური პოლიტიკური სპეკულაცია. ეს ყველაფერი ბუმერანგივით შემოუტრიალდება სააკაშვილს და კითხვებზე პასუხის გაცემა მოუწევს. ჩვენმა პარტნიორებმა ეს ინფორმაცია იციან,“ – განაცხადა ირაკლი სესიაშვილმა.
მანანა ღოღობერიძე
