„ხელისუფლებიდან წასვლისას ჩვენ დავტოვეთ ბევრი პროექტი და ამ პროექტების განსახორციელებლი თანხა. თუმცა დასრულებული, გამზადებული პროექტების შესრულებაც ვერ შეძლეს“. აჭარის შეჩერებული პროექტების და მომავალი გეგმების შესახებ უკრაინის პრემიერ–მინისტრის მრჩეველმა, აჭარის მთავრობის ყოფილმა თავმჯდომარემ ლევან ვარშალომიძემ „რუსთავი2“–ზე, გადაცემა „არჩევანში“ ისაუბრა.
„აჭარაში სიტუაცია კატასტროფულია, რეალურად არ ვიცი ვის დანიშნავენ ახალ თავმჯდომარედ. ჩემი გეგმები არ უკავშირდება აჭარას. ჩემი ჩამოსვლის მიზანია, რომ ჩავუდგე სათავეში გუნდს და ჩავერთო საარჩევნო კამპანიაში. ჩვენი მიზანია 8 ოქტომბერს არჩევნები მოვიგოთ და 9 ოქტომბერს დავიწყოთ გეგმის შესრულება. მოსახლეობას შევხვდი ბათუმშიც, მთიან აჭარაშიც, ყველგან არის ერთი კითხვა, რა გვეშველება? გაჭირვება ძალიან დიდია და მოსახლეობას ამ კითხვაზე უნდა გავცეთ პასუხი.
ააშენეს სოციალური სახლი შიგ ხულოში, გზის პირას, სადაც არანაირი ინფრასტრუქტურა არ არის. აქედან ხალხი ბათუმშია ჩამოსაყვანი, რომ მიეცეთ საშუალება სამუშაო ადგილის შექმნისთვის. მარტივად გადაწყვიტეს, ავტობუსებს დავუნიშნავთ და ხულოს ცენტრიდან ჩამოვიყვანთ ბათუმშიო. აჭარის პროექტები მხოლოდ ბათუმს არ ემსახურეოდა. ეს პროექტები მთელ საქართველოზე გადიოდა. ერთ–ერთი მაგალითია აეროპორტი. ეს არ არის მხოლოდ ქობულეთსა და ბათუმში მომსახურე აეროპორტი. ეს იყო ფოთზე, გურიაზე, მთლიანად დასავლეთ საქართველოზე ორიენტირებული. ქალაქ ბათუმს დააკარგვინეს საგანმანათლებლო ცენტრის ფუნქცია, სადაც უნდა გაშენებულიყო ტექნოლოგიური უნივერსიტეტი. ბათუმში შეჩერდა ნაპირსამაგრი სამუშაოები. წყლის და კანალიზაციის პროექტის მესამე ეტაპი 2014 წელს უნდა დასრულებულიყო, თუყმცა დღემდე გრძელდება. შემოვლითი გზის პროექტს ჩვენს შემდეგ ერთი კილომეტრიც არ მიმატებია, გაჩერებულია ბაგრატიონის ქუჩის და სტადიონის პროექტებიც.
2012 წელს აჭარაში არჩევნები წავაგეთ და ამას ჰქონდა მიზეზები. ყველაზე დიდი შეცდომა იყო,რომ მოსახლეობის ჩართულობა არ არსებობდა. არჩევნების შემდეგ, 9 ოქტომბრიდან ყველა პროექტში მათი ჩართულობა იქნება. პროექტები იმდენად სწრაფად ხორციელდებოდა, ვერ ვასწრებდით ახსნას მოსახლეობისთვის. სისწრაფესთან ერთად შეცდომებსაც ვუშვებდით და ეს ნორმალურია. ეს სამწელიწად–ნახევარი დიდი დრო იყო იმისთვის,რომ შეცდომები გაგვეანალიზებინა, მზად ვართ მეტი პროექტი და ინოვაცია შევიტანოთ როგორც ქვეყანაში, ისე კონკრეტულად აჭარაში. სულ სამი დღეა რაც ჩამოვედი, გუნდთან კონსულტაციებს გავდივარ და მომავალ კვირაში ახალი გეგმის პრეზენტაცია გვექნება,“ – განაცხადა ლევან ვარშალომიძემ.
მანანა ღოღობერიძე
