„მედია–გარემო გახსნილია, სივრცე არის აბსოლუტურად თავისუფალი. აბსურდია, რომ ვინმეს რამის ეშინია. ყველა ლაპარაკობს ყველაფერზე და ზოგჯერ ზომაზე მეტსაც“. წინასაარჩევნო გარემოს მდგომარეობაზე და ჯონ კერის ვიზიტის დეტალებზე „ქართული ოცნების“ წევრმა ნუკრი ქანთარიამ ტელეკომპანია „მაეტროს“ ეთერში, გადაცემა „მაესტროს ფაქტორში“ ისაუბრა.
„საარჩევნო გარემო ძირფესვიანად არის შეცვლილი. ჩვენი ამოცანაა გამჭვირავლე და სამართლიანი არჩევნების ჩატარება ყველანაირი მუქარის, გაყალბების გარეშე. არც ერთი მოქალაქის ხმა არ დაიკარგება და ეს დასაფასებელია. ტირილი რამდენიმე სარეკლამო წუთზე არასწორია. მაქსიმალურად გვინდა, რომ იყოს მაღალი დონის არჩევნები. ეს არის ჩვენი პირდაპირი ამოცანა და მოვალეობა, და ასეც იქნება.
კორცხელის შემდეგ ჩვენ მივიღეთ კანონი, თუ არის სიმპტომები, რომ ატყდეს აურზაური, პოლიციას აქვს უფლება შევიდეს შენობაში და გაანეიტრალოს სიტუაცია. მხარდამჭერები წესრიგს თავისით ვერ დაიცავენ, მხოლოდ ამიტომ მივიღეთ ეს კანონი. ოპოზიციას უნდა შებრუნება, თითქოს ეს კანონი მათ დასაშინებლად მივიღეთ.
ის, რაც ჯონ კერიმ თქვა, მოცემულობაა. ის საკმაოდ გამოცდილი პოლიტიკოსია და კარგად იცის რა მდგომარეობებია ისეთ ქვეყნებში,როგორიც არის უკრაინა და საქართველო. იცის როგორი იყო საქართველო თუნდაც ოთხი წლის უკან და როგორია დღეს. ეს შეფასება არის რეალური.
ერთ უცნაურ ფაქტს მაინც წავაწყდი,თითქოს ბატონი კერი შალვა ნათელაშვილის ძალისხმევის შედეგად ჩამოსულა, იმისთვის რომ მას გადააბარონ ხელისუფლება. ზოგს ჰქონდა იმედი,რომ ბატონი კერი ჩამოვიდა რომელიმე პარტიის ლობისტად. ის არავის ლობისტად არ ჩამოსულა, იყო საქმიანი ვიზიტი დაცლილი ყოველგვარი პომპეზურობისგან. ეს ვიზიტი იყო ჩვენი ურთიერთობის გაღრმავების გარანტი,“ – განაცხადა ნუკრი ქანთარიამ.
მანანა ღოღობერიძე
