დევნილთა მინისტრი ადასტურებს ინფორმაციას, რომ “ცენტრ პოინტმა” მისი უწყების ორ ტენდერში გაიმარჯვა, თუმცა სოზარ სუბარის თქმით, კონტრაქტი გაუქმდა, რადგან კომპანიამ საბუთების წარმოდგენა ვერ შეძლო.“ვერ ვისაუბრებ რჩეულიშვილების კეთილსინდისიერ ბიზნესებზე, ნებისმიერი თბილისელი გაგცემთ ამაზე პასუხს. სააკაშილის დროს რომ ძიებები მიდიდოდა, იმედია, ჩემი ბრალი არ არის. მოიგო ერთი ტენდერი გამზადებული კორპუსით, ხოლო როცა ვუთხარით, რომ ვყიდულობთ ამ კორპუსში ბინებს დევნილებისთვის, გვითხრა, რომ აქ ისედაც მშვენივრად ვყიდი და გვერდით, რომ ავაშენებ იმაში მოგყიდითო, იმ კორპუსზე ხელშეკრულება არ ყოფილა, ის არ მოუგია და ბუნებრივია, თავს არ მოვატყუებინებდით. მეორე – ორსართულიანი აშენებული კორპუსი მოიგო, ამერიკის საელჩოსთან, თითქმის დამთავრებული იყო მშენებლობა, სიამოვნებით ვიყიდდით, თუმცა ვერ წარმოდგინა საბუთები”, – განაცხადა სუბარმა.
შეგახსენებთ, რომ 10 ივლისს, ცენტრ-პოინტის ბათუმის საინვესტიციო პროექტის ხელმძღვანელი ირაკლი მინდელი და კომპანიის გაყიდვების მენეჯერი სალომე ჩარკვიანი დააკავეს. ასევე დღეს, პროკურატურამ მაია და გუკა რჩეულიშვილების დაკავაბის მოთხოვნით სასამართლოს მიმართა.
