„ყველა რეგიონს თავისი მიმზიდველობა აქვს, იმერეთიც განსაკუთრებულია. აქ არის პარლამენტი, სიდიდით მეორე ქალაქი–ქუთაისი. ამიტომ მაჟორიტარი კანდიდატების წარდგენა იმერეთიდან დაიწყო. ინტენსიური კონსულტაციები ბოლო ეტაპზეა. უახლოეს ხანში დიდი ალბათობით პარტიის ახალი გუნდი, ახალი რესურსი იქნება წარდგენილი“. პარტიის მომავალი გეგმების, ასევე „კონსერვატორების“ და „რესპუბლიკელების“ მომავალი პარტიული საქმიანობის შესახებ უმრავლესობის წევრმა, ფრაქცია „ქართული ოცნების“ თავმჯდომარე გია ვოლსკიმ ტელეკომპანია „GDS“–ზე, გადაცემა „2030“–ის ეთერში ისაუბრა.
„რაც შეეხება კონსერვატორებს, სანამ საბოლოო ბეჭედი არ დაესმება და პრემიერ–მინისტრი, როგორც პარტიის ლიდერი თავად არ გააკეთებს განცხადებას, მხოლოდ პოზიტიურის თქმა შემიძლია. მე დიდი სიამოვნებით დავუჭერ მხარს მათ კანდიდატურას რომელიმე რეგიონში. ამასთან დაკავშირებით მოლაპარაკებები ინდივიდუალურად მიმდინარეობს და კონსულტაციები აღმასრულებელ ფაზაშია.
მნიშვნელოვანია „რესპუბლიკელების“ და კონკრეტულად თავდაცვის მინისტრის საკითხი. გადაწყვეტილება უნდა განაპირობოს იმან, თუ რამდენად აქტიურები იქნებიან „რესპუბლიკელი“ მინისტრები წინასაარჩევნო პროცესში და საერთოდ ექნებათ თუ არა პოლიტიკური საქმიანობა. ვნახოთ რა გადაწყვეტილებას მიიღებს პრემიერი. „რესპუბლიკური“ პარტიის საუკეთესო რესურსი დღეს მინისტრთა კაბინეტშია. თავად მსჯელობენ სჭირდებათ თუ არა მინისტრების სახით დამატებითი პოლიტიკური რესურსი. მთავრობაში მსჯელობენ არის თუ არა რეალური,რომ კონკრეტული დარგის ხელმძღვანელობა შეიცვალოს იმ შემთხვევაში თუ ისინი პარტიულ ნეიტრალობას განაცხადებენ, მესამე საკითხია არის თუ არა რეალური პოლიტიკურ ნეიტრალობაზე დარგის ხელმძღვანელებმა ისაუბრონ. გუნდთან კონსულტაციის გარეშე ამ თემაზე საუბრისგან თავს ვიკავებ. მით უმეტეს, რომ ჩემი კომენტარი შესაძლოა არ შეესაბამებოდეს რეალობას და პრემიერ–მინისტრის პოზიციას. მას მეტი ინფორმაცია აქვს და მიიღებს სამართლიან გადაწყვეტილებას.
რაც შეეხება „საერთაშორისო გამჭვირვალობის“ ანგარიშს პარლამენტის პრობლემების შესახებ, უხეშად რომ ვთქვა ეს შეიძლება „ნაციონალური მოძრაობის“ ხელის დაფარება იყოს. მათ ნაწილს სახეზეც ვერ ვცნობ იმდენად ხშირია მათი მხრიდან გაცდენები. რეგლამენტში წერია, რომ გაცდენა დასაშვებია მივლინების, ავადმყოფობის, ან ოჯახური მდგომარეობის გამო. არ შეიძლება მივლინებაში იყო მთელი თვით, როცა 100–იდან 99 შემთხვევაში პარლამენტარი აცდენს, ვერ დაწერ,რომ ეს ოჯახური მდგომარეობის გამო ხდება. მათი მხრიდან ესეც ბოიკოტის რეჟიმის ერთ-ერთი სახეა. რაც შეეხება მთავრობის კონტროლს, მინისტრები პარლამენტში იყვნენ ყოველთვის, როცა საჭირო იყო. ბოლო პერიოდში ადამიანის უფლებათა დაცვის კომიტეტის სხდომაზე თითქმის ყველა მინისტრი იყო წარმოდგენილი და მოისმინეს უჩა ნანუაშვილის მოხსენება,“ – განაცხადა გია ვოლსკიმ.
მანანა ღოღობერიძე