„ჩვენ ისეთ პროდუქტს ვაწვდით მოსწავლეებს, რომ საერთო საბავშვო რეფერენდუმი რომ ჩავატაროთ და ვიკითხოთ დაიხუროს თუ არა სკოლები, ნამდვილად დაიხურება“. განათლების სისტემის პრობლემურ მიმართულებებზე და დაგეგმილ რეფორმებზე განათლების მინისტრმა ალექსანდრე ჯეჯელავამ „საზოგადოებრივი მაუწყებლის“ ეთერში, გადაცემა „ინტერ VIEW“–ში ისაუბრა.
„ხარისხის პრობლემაა ჩვენს განათლების სისტემაში ყველა მიმართულებით. სკოლამდელიდან დაწყებული მეცნიერებით დამთავრებული ექვსივე მიმართულებაში ფუნდამენტური პრობლემებია. ეს სისტემა გასაუმჯობესებელია როგორც თვისობრივად, ასევე მარკეტინგულად. სასკოლო განათლება ბევრ ქვეყანაში ბედნიერი ადამიანების სამჭედლოდ მიიჩნევა, მაგრამ საბჭოთა რეალობაში მეტი აქცენტი ფაქტობრივ, აკადემიურ ცოდნაზე კეთდებოდა. დღევანდელი სკოლა აცდენილია პრინციპებს. ნაპრალია იმათ შორის რა სჭირდება ბავშვებს და რა გვჭირდება ჩვენ. რაც უფრო მაღალ კლასში გადავდივართ, ეს ნაპრალი იზრდება. ამის მტკიცებულობაა რეპეტიტორების ინსტიტუტი,რომელიც ასე ყავვის.
უნდა ჩამოვყალიბდეთ რა არის ჩვენი განათლების სისტემის მთავარი მიზანი. ფუნდამენტური პრინციპები მულტფილმებით, თამაშებით, სოციალიზაციის პირველივე ეტაპზე, სკოლამდელ ასაკში, საბავშვო ბაღებში ყალიბდება. თუ ვინმე პრობლემის მოგვარების გზას ჩხუბში ხედავს, მას ეს ახლა არ უსწავლია, მსგავსი დამოკიდებულება ფენებად ყალიბდებოდა სხვადასხვა ასაკში.
პრობლემაა უმაღლეს სასწავლებლებშიც. დაფინანსების სისტემა წაახალისებს უხარისხობას. უმუშევრობის ქარხანა გვაქვს შექმნილი და სამწუხაროდ ეს ქარხანა სახელმწიფო საწვავზე მუშაობს. რაც შეეხება მეცნიერებას, ეს საბოლოო ბეჭედს უსვამს არასწორი მოვლენების ჯაჭვს. მეცნიერი ასოცირდება ღარიბ, გაჭირვებულ ადამიანთან. ბაზრის მოთხოვნაა ლიბერალური ფასეულობები, კრიტიკულად მოაზროვნე ადამიანები. ამიტომ ფუნდამენტური მიზანი, მთავარი ამოცანაა შევქმნათ ჰარმონიული ადამიანი ყველა მხრივ. პროფესიულად არარეალიზებული ადამიანი ჰარმონიას და ბედნიერებას ვერ აღწევს“.
ალექსანდრე ჯეჯელავამ მასწავლებელთა კომპეტენტურობაზე და სასერტიფიკატო გამოცდების სისტემაზეც ისაუბრა.
„არ ვეთანხმები არაკომპეტენტური მასწავლებლების საკითხს. მასწავლებელთა დიდი რაოდენობის ჩაჭრის ორი მიზეზი არსებობს: საკმაოდ მაღალი ბარიერია და მასწავლებლებს არ აქვთ მოტივაცია. თუ მაღალ თამასას დავაყენებთ და წინასწარ გვეცოდინება,რომ ვერავინ გადალახავს,ჩაჭრა 83 % კი არა, 93% იქნება. ვგეგმავთ სასერტიფიკატო გამოცდების პროგრამის დახვეწას. მასწავლებელს მეტი შესაძლებლობა ექნება ქულების დასაგროვებლად და ბარიერის გდასალახად. ეს მხოლოდ საგნის ცოდნაზე არ იქნება მიბმული. ბავშვის მოტივირება ამას არ გულისხმობს.
მანანა ღოღობერიძე
