,,თავისუფალი დემოკრატების ლიდერმა“ ირაკლი ალასანიამ პარტიის ახალი აღმასრულებელი მდივანი წარადგინა. თამარ კეკენაძე პარტია ,,თავისუფალ დემოკრატებს“ 2015 წელს შემოუერთდა, დღეიდან კი ის პარტიის რიგებში ახალ პოზიციას დაიკავებს.
,,მინდა წარმოგიდგინოთ, თავისუფალი დემოკრატების ახალი აღმარულებელი მდივანი – თამარ კეკენაძე, რომელიც თავისუფალი დემოკრატების ახალმა გამგეობამ აირჩია. თამარი კოორდინაციას გაუწევს პარტიის რეგიონალური, საქალაქო და რაიონული ორგანიზაციების საქმიანობას.
თამარი თავისუფალ დემოკრატებს 2015 წელს შემოურთდა და რეგიონებში ჩვენი პარტიის გაძლიერება, განახლება ჩაბარდა.
თამარი გავიცანი, როდესაც თავდაცვის სამინისტროში მივედი. ის 2012-2015 წლებში გახლდათ თავდაცვის სამინისტროს მთავარი სამოქალაქო წარმომადგენელი ნატოსა და ევროკავშირში.
საჯარო სამსახურს მიღმა, თამარს ასევე აქვს ქართულ და საერთაშორისო ორგანიზაციებში მუშაობის დიდი გამოცდილება, გავლილი აქვს პრაქტიკა ევროპარლამენტის პრეზიდენტის პოტტერინგის კაბინეტში და ევროპის მასშტაბით წლების განმავლობაში მუშაობდა ახალგაზრდების ინტერესების დამცველად.
მინდა აღვნიშნო, რომ თამარი ერთადერთი ქართველია, რომელსაც 2008 წელს, ევროპული ღირებულებების გავრცელებისათვის მიენიჭა „წლის ახალგაზრდა ევროპელის“ სტატუსი“, განაცხადა ირაკლი ალასანიამ.
,,მოგესალმებით, მადლობა მობრძანებისთვის და პირველ რიგში, მადლობა მინდა გადავუხადო ჩვენი პარტიის გამგეობას გამოცხადებული ნდობისთვის.
მაშინ, როდესაც თავდაცვის სამინისტროს 5 უდანაშაულო ადამიანი დააკავეს და ირაკლი ალასანიამ დატოვა თანამდეობა, მე მივიღე ნატოდან და თავდაცვის სამინისტროდან წამოსვლის გადაწყვეტილება.
თავდაცვის სამინისტროში 5 წელი ვიმუშავე. ყველა იმ მნიშვლეოვანი და მტკივნეული რეფორმის განხორციელბა, რამაც ჩვენი ქვეყანის ნატოში და ევროკავშირში ინტეგრაციის პროცესი ახალ საფეხურზე გადაიყვანა, სწორედ ირაკლი ალასანიას მინისტრობის პერიოდში შევძელით. ამიტომ მივიღე თავისუფალ დემოკრატებში გაწევრიანების გადაწყვეტილება, ჩავთვალე რომ, ეს ის გუნდია, რომელთან ერთადაც საქართველოს უკეთესი მომავლის შექმნა რეალური და მართლაც განხორციელებადი იქნებოდა. რადგან პირველად მეძლევა ამ საკითხზე საუბრის შესაძლებლობა, მინდა ჩვენმა საზოგადოებამ იცოდეს, რომ სწორედ იმ 5 უდანაშაულო ადამიანის, მაღალი რანგის პროფესიონალების დამსახურებით შეძლო თავდაცვის სამინისტრომ და საქართველომ, თავდაცვის შესყიდვების სისტემის რეფორმირება, რაც ნატოში ინტეგრაციის პროცესის ერთ-ერთ მნიშვნელოვან პრობლემურ საკითხად ითვლებოდა წლების განმავლობაში.
საქართველოში დაბრუნებისთანავე, ირაკლი ალასანიასთან ერთად მოვიარე მთელი საქართველო და თავიდან გავეცანი თუ რა მძიმე რეალობაში ვცხოვრობთ დღეს. თითოეული ის ადამიანი, რომელიც ამ პერიოდის განმავლობაში შევხვდი იმსახურებს უკეთეს ცხოვრებას.
ჩემი, როგორც ,, თავისუფალი დემოკრატების” აღმასრულებელი მდივნის, პირველი ამოცანა იქნება 8 ოქტომბრის საპარლამენტო არჩევნებში გამარჯვება. სწორედ იმიტომ, რომ ჩვენი მოსახლეობა იმსახურებს უკეთესს და ,,თავისუფალი დემოკრატები” ვართ ის გუნდი, ვისაც გვაქვს ძალა, პროფესიონალიზმი და ამბიცია შევქმნათ უკეთესი ცხოვრება ჩვენი თანამოქალაქეებისთვის“, განაცხადა თამარ კეკენაძემ.
