ფინანსთა მინისტრი ნოდარ ხადური ESCAP-ის მაღალი დონის პოლიტიკურ დიალოგში მიიღებს მონაწილეობას
დღეს, ნოდარ ხადური ყაზახეთის რესპუბლიკაში გაემგზავრა, სადაც ქალაქ ალმაატაში მონაწილეობას მიიღებს ESCAP-ის (გაერო-ს ეკონომიკური და სოციალური კომისია აზიისა და წყნარი ოკეანის რეგიონისთვის) მაღალი დონის პოლიტიკურ დიალოგში სახელწოდებით: „მაკროეკონომიკური პოლიტიკა მდგრადი და სტაბილური ზრდისთვის ჩრდილოეთ და ცენტრალურ აზიაში“ (Macroeconomic Policies for Sustainable and Resilient Growth in North and Central Asia)
დაგეგმილია საქართველოს ფინანსთა მინისტრის, ნოდარ ხადურის მიმართვა დიალოგის მონაწილეებისადმი.
ფინანსთა მინისტრი ნოდარ ხადური ასევე უხელმძღვანელებს სესიას თემაზე: „განვითარებისთვის საჭირო ფისკალური პოლიტიკა და მისი საბიუჯეტო შედეგი.“
ფინანსტა სამინოისტოს განცხადებით, საქართველოსთვის აღნიშნული დიალოგი მნიშვნელოვანია საერთაშორისო ორგანიზაციებთან ურთიერთობის გასაღრმავებლად და ინვესტორების დაინტერესების გასაზრდელად, ასევე მონაწილე ქვეყნებთან ორმხრივი ურთიერთობის განვითარებისთვის.
შეხვედრის მონაწილეები განიხილავენ რეგიონში არსებულ სოციალურ-ეკონომიკურ ვითარებას, ფულად-საკრედიტო, საბიუჯეტო და საგადასახადო პოლიტიკას, ეკონომიკური ზრდის პერსპექტივას რეგიონისთვის, დასაქმებისა და სოციალური დაცვის საკითხებს.
დელეგატები გაეცნობიან საქართველოს გამოცდილებას, ქვეყანაში მიმდინარე რეფორმებს, აგრეთვე ქვეყნის წინაშე არსებულ გამოწვევებს. ამ თემაზე ფინანსთა მინისტრთან, ნოდარ ხადურთან ერთად, მოხსენებას გააკეთებს მინისტრის მოადგილე დავით ლეჟავა.
პოლიტიკურ დიალოგში მონაწილეობენ დელეგაციები სამხრეთ კავკასიისა და ცენტრალური აზიის ქვეყნებიდან, აგრეთვე წარმომადგენლები საერთაშორისო საფინანსო და დონორი ორგანიზაციებიდან (ევრაზიის ეკონომიკური კომისია; ეკონომიკური თანამშრომლობის ორგანიზაცია; გაერო; მსოფლიო ბანკი; სსფ; აზიის განვითარების ბანკი; ევრაზიის განვითარების ბაკი; ევროპის რეკონსტრუქციისა და განვითარების ბანკი და სხვა) სამოქალაქო საზოგადოებისა და კერძო სექტორის წარმომადგენლები და ინვესტორები.
26.08.13
