დედაქალაქში ბოლო რამდენიმე წლის განმავლობაში, როგორც ცენტრში, ისე მიმდებარედ, რამდენიმე სავაჭრო ცენტრი გაიხსნა. მათ 2015 წელს „EastPoint თბილისი“ შეუერთდა.
EastPoint – ი მიმდინარე წელს პოზიტიურად აფასებს და იმედოვნებს, რომ მომავალ წელს ფართების დარჩენილ 8%-ითაც დაინტერესდებიან საერთაშორისო ბრენდები. კოპანიებს შორის მოლაპარაკებები დაწყებულია, თუმცა იმას, თუ რომელ ბრენდს ვიხილავთ 2017 წელს, ჯერ ცნობილი არაა.
კომპანიისთვის არსებული წელი სხვა ბიზნეს-სიახლეებთან ერთად, განსაკუთრებული, აღმოჩნდა საოჯახო გასართობის ცენტრის დაარსებით. ცენტრმა გასართობი ცენტრების კატეგორიაში საერთაშორისო ჯილდოც დაიმსახურა. პრიზი გადაეცა ცეტნრის მასშტაბის, ატრაქციონების მრავალფეროვნებისა და ცენტრში მოქმედი უსაფრთხოების ზომებისა და სხვა მთელი რიგი კრიტერიუმების დაკმაყოფილების გამო.
კომპანიის მარკეტინგის დირექტორი თეა ლომინაძე „თბილისი თაიმსთან“ EastPoint-ის არსებობის პირველ წელზე საუბრობს და ვარკეთილში, სამომავლოდ, „ჰუალინგის საერთაშორისო სავაჭრო ცენტრის“ გახსნასთან დაკავშირებით კომენტარს აკეთებს.
როგორ შეაფასებთ 2016 წელს, რამდენად მომგებიანი იყო „East-Point”-ისთვის ფინანსურად არსებობის პირველი წელი?
– პირველ რიგში, ვიტყვი, რომ ეს ერთი წელი ძალიან საინტერესო გამოდგა. სრული ციკლი შევასრულეთ და შეგვიძლია უკვე გარკვეული შეფასებების გაკეთება.
ფინანსური თვალსაზრისით ამ ერთ წელს პოზიტიურად ვაფასებთ. მცირე გადაჭარბებით, თუმცა მაინც გადაჭარბებით შევასრულეთ ის გეგმები, რომლებიც ჩვენი მხრივ, ორგანიზაციას ჰქონდა დასახული შარშან, გახსნისას.
ეს ერთი წელი, ვფიქრობ რომ, ძალიან ნაყოფიერი იყო და მეტი წინსვლით გავაგრძელებთ მომავალ წელსაც. 2016 წელი კარგი სტარტი აღმოჩნდა, რაც დამეთანხმებით, რომ ყველაზე მთავარია.
რა პრობლემები გამოიკვეთა (ბიზნესის კუთხით), რამ იმუშავა ყველაზე უკეთ და თქვენი აზრით, რა იყო მომხმარებლისთვის ყველაზე საინტერესო?
– იქიდან გამომდინარე, რომ „ისთ-ფოინთის“ ბიზნეს მოდელი წარმოადგენს ფართების გაქირავებას მე გამიჭირდება კონკრეტული ბიზნესის სახელით ვთქვა, თუ რამდენად მომგებიანი იყო წელი. კონკრეტული ერთეულების ოპერირება ჩვენზე არ არის დამოკიდებული.
ჩვენზე, რაც იყო დამოკიდებული, რაც გავაკეთეთ და რამაც ყველაზე უკეთ იმუშავა არის გასართობი ინფრასტრუქტურა – ბავშვთა გასართობი ცენტრი. ცენტრის, რომელიც 3500 კვადრატულ მეტრზეა განთავსებული, საინვესტიციო ღირებულება 6 მილიონი დოლარი იყო და შემიძლია ვთქვა, რომ EastPoint -ში ამ პროექტმა გაამართლა, ის ნამდვილად წარმატებულია.
როდესაც ვსაუბრობდით სავაჭრო ცენტრის შექმნაზე, გავითვალისწინეთ ისიც, რომ სავაჭრო ცენტრის კარგად მუშაობისთვის სხვა ისეთ აუცილებელ კომპონენტებთან ერთად, როგორიცაა სუპერმარკეტი, კინო და ა.შ, საჭიროა საოჯახო გასართობი ცენტრი. აქედან გამომდინარე და კიდევ იმიტომ, რომ ადგილობრივ ბაზარზე არ იყო არცერთი ოპერატორი და არ არსებობდნენ დაინტერესებული ადამიანები, რომლებიც შექმნიდნენ და გააკეთებდნენ ამას, როგორც ბიზნეს ერთეულს, ჩვენმა საინვესტიციო ჯგუფმა მიიღო გადაწყვეტილება, რომ თვითონ გაეკეთებინა ეს ბიზნესი. და სავაჭრო ცენტრიც გახდა სრულყოფილი. ესაა ის ბიზნესი, რომელიც „ისთ ფოინთში“ დამატებით გაკეთდა და რომელსაც ძალიან პოზიტიურად და გამართლებულად ვაფასებთ.
რას გეგმავთ მომავალ წელს, როგორია თქვენი სამომავლო გეგმები, აპირებთ თუ არა მაღაზიების დამატებას და ახალი ინვესტიციების განხორციელებას?
მოცემულ ეტაპზე, ჩვენი გასაქირავებელი ფართის 92%-ი უკვე დაკომპლექტებულია, შესაბამისად, არსებული ფართის 8 %-ი მთელი წლის განმავლობაში უნდა შეივსოს და უკვე მიმდინარეობს მოლაპარაკებები. პროექტის ფარგლებში განვითარების პერსპექტივები, ბუნებრივია, არსებობს. ამ დროისთვის გამიჭირდება ზუსტად ვთქვა 2017 წელს, რა იქნება, თუმცა ჩვენ უკვე ნაფიქრი გვაქვს, რომ როგორც კი დაინტერესდებიან საერთაშორისო ბრენდები ჩვენ მზად უნდა ვიყოთ მისაღებად. ამ ეტაპზე, სამწუხაროდ, გაჟღერება გამიჭირდება.
ვარკეთილში „ჰუალინგის“ საერთაშორისო სავაჭრო ცენტრი იხსნება, როგორ შეაფასებთ სამომავლოდ კონკურენციის თვალსაზრისით,ცენტრის გახსნას?
– ზოგადად, ჩვენ ძალიან მივესალმებით კონკურენციას, იმიტომ, რომ კონკურენცია არის ის, რაც განაპირობებს ბაზრის განვითარებას, – ჯანსაღი კონკურენცია. ამ პროექტს, რაც შეეხება, მეც ჩვენი თანამოქალაქეების მსგავსად ვარ ინფორმირებული, ამ ეტაპზე გამიჭირდება შეფასება, იმიტომ რომ, როდის და როგორ გააკეთებენ ოპერირებას, ან რა ბრენდები იქნება წარმოდგენილი, არავინ ვიცით ზუსტად.
თუმცა ჩვენ მეზობლები გამოვდივარ და კიდევ უფრო მეტი ძალისხევა დაგჭირდება ორივეს, რომ მომხარებლის გული მოვიგოთ.
ნათია კეკენაძე
