„7 ნოემბერი იყო მაგალითი, როგორ არ უნდა მოექცეს მოსახლეობა საკუთარ ხალხს. ყველაფერი რასაც აკეთებდნენ, იყო არაევროპული მიუხედავად იმისა, რომ მათ კარგად იცოდნენ ინგლისური. ინგლისურის ცოდნა არ არის ევროპა“. ამის შესახებ დევნილთა და განსახლების მინისტრმა სოზარ სუბარმა ტელეკომპანია „იმედზე“, გადაცემა „ქრონიკის“ ეთერში ისაუბრა.
„მათ დაარღვიეს ყველაფერი, რისი დარღვევაც შეუძლია ხელისუფლებას. ამ ყველაფრის შემდეგ თავს უფლებას აძლევენ დემოკრატიაზე და ევროპულ სტანდარტებზე ისაუბრონ. „ნაციონალური მოძრაობა“ ითვლება მეორე პოლიტიკურ ძალად, სამწუხაროა, მაგრამ ეს იყო ქართველი ხალხი არჩევანი. პოლიტიკური ფასი „ნაციონალურმა მოძრაობამ გადაიხადა“. პოლიტიკური სტაგნაციის, იმ ეკონომიკის პერიოდში, რომელიც დახვდათ შევარდნაძის შემდეგ მოსულ გუნდს, არ უნდა დასჭირვებოდათ არა თუ ორი ვადის განმავლობაში ხელისუფლების შენარჩუნება, არამედ იქეთ უნდა შევხვეწნოდით, რომ კიდევ შეეცვალათ კონსტიტუცია. მიხეილ სააკაშვილმა ეს ვერ შეძლო და გაყალბებული არჩევნებით მოვიდა ხელისუფელბაში. რომ არა აგვისტოს ომი, კიდევ უფრო ადრე მოუწევდა ხელისუფლების დატოვება. საგარეო საფრთხემ გადაავადა მისი გადადგომა.
იმდენად მწარედ განვიცადეთ ეს მოვლენები, გაცილებით სწრაფი და რადიკალური მოქმედებები მომეწონებოდა ჩვენი მხრიდან. თუმცა სამართალი სხვა რამეა, არ უყვარს სისწრაფე. სამართლიანობის აღდგენაზე თუ ვსაუბრობთ, ის, რომ ტელეკომპანია „იმედი“ მფლობელს დაუბრუნდა და თავისუფლად ვსაუბრობთ, ამის ნაწილია. სამართლიანობის აღდგენაზე მიუითებს ის ფაქტიც, რომ რამდენიმე ადამიანს, წამყვანი თანამდებობის პირებს ბრალი აქვთ წაყენებული და სასამართლო განხილვა მიდის 7 ნოემბრის საქმეზე. იგივე ხდება 2011 წლის 26 მაისის საქმეზეც. ყველას ვერ გაასამართლებ, თუმცა ქართველმა ხალხმა პოლიტიკური განაჩენი გამოიტანა,“–განაცხადა სოზარ სუბარმა.
მანანა ღოღობერიძე
