„ხმები გაიფანტა, მათ შორის ჩემი ხმაც დაიკარგა, რადგან მე მრავალპარტიულ პარლამენტს მივეცი ხმა. ეს არ არის ტრაგიკული ვითარება, თუმცა ეს არის ადგილზე გაჩერება. ორპარტიული პარლამენტი რეალურად არც არადემოკრატიულია, არც აპრიორი ცუდი,მაგრამ არის გუშინდელი დღე“. გიორგი მარგველაშვილმა ორპარტიული საკანონმდებლო ორგანოს შესახებ და არჩევნების მიმდინარეობის პროცესზე „რუსთავი 2“–ზე, გადაცემა „არჩევანის“ ეთერში ისაუბრა.
„ წინასაარჩევნო კამპანიისას „ქართული ოცნების“ მხრიდან იყო ტემპერატურის აწევის ტენდენცია ამომრჩევლის მობილიზაციისთვის. ზუსტად იგივენაირად მეორე პოლუსური ძალა, „ნაციონალური მოძრაობა“, ასევე ეწეოდა კამპანიას ტემპერატურის ასაწევად და ფაქტობრივად იგივე რიტორიკაში იყო ჩართული. ყოფილი პრეზიდენტის რიტორიკა უკრაინიდან იყო ისეთი, რომ მშვიდობიანი საარჩევნო რეჟიმიდან გადავსულიყავით ექსტრემალურ პირობებში. ეს იყო ერთ–ერთი მიზეზი, რატომაც ვერ შევქმენით მრავალპარტიული პარლამენტი. ოპოზიციამ ვერ გაიაზრა, რომ ეს ორი დიდი სტრუქტურა მოახდენდა ველის პრივატიზაციას. არ მოხდა ოპოზიციის გაერთიანება, მესამე ალტერნატივის ჩამოყალიბება. ფაქტობრივად ყველა მაჟორიტარული მანდატი წაიღო ერთმა პარტიამ. ეს არის წინგადადგმული ნაბიჯი პლურალისტური დემოკრატიისთვის? მარტივად არა.
მე ვთქვი, რომ ხმა მივეცი მრავალპარტიულ პარლამენტს და იმედიც მქონდა, რომ ჩვენი არჩევნები იქნებოდა კიდევ ერთი წინ გადადგმული ნაბიჯი პოლიტიკური სისტემის დახვეწის თვალსაზრისით. იმედი მქონდა, რომ არჩევნების შემდეგ შეიქმნებოდა მრავალპარტიული საკანონმდებლო ორგანო. ჩვენ ახლა ვხედავთ ფაქტობრივად იგივეს, რაც ვნახეთ 2012 წლის შემდეგ. პარლამენტში ისევ ორი პოლუსია წარმოდგენილი. პატრიოტთა ალიანსის მცირე რაოდენობის დეპუტატები ძალთა ბალანსზე ვერ იმოქმედებენ. საარჩევნო კამპანიამ განაპირობა ის რეალობა, რომ ვსაუბრობდით სტაბილური პოლიტიკური ძალებისგან შემდგარ მრავალპარტიულ პარლამენტზე, მაგრამ ეს ვერ შედგა.
არჩევნების დღეს იყო ინციდენტები, თუმცა ძალადობა, ნორმალური პოლიტიკური დღის წესრიგიდან გადახვევა არ ყოფილა ტენდენციური, სისტემური. საზოგადოებამ და პოლიტიკურმა კლასმა გაიაზრა, რომ ძალადობით და დარღვევებით ჩატარებული არჩევნები იქნებოდა იმ გზიდან გადახვევა, რომელიც საქართველოს აქვს არჩეული.არჩევნების პროცესი ჩემთვის დაიწყო წელიწადნახევრის წინ, როდესაც მთელი ოპოზიციური სპექტრი და არასამთავრობო სექტორი გაერთიანდა იმ ცვლილების ირგვლივ, რომელიც საარჩევნო სისტემაში უნდა მომხდარიყო. ამ წამოწყებას არ დაესწრო კოალიცია „ქართული ოცნების“ არც ერთი პარტია. ტენდენცია მმართველ გუნდში იმისთვის, რომ მრავალპარტიულ სისტემას ხელი შეუწყოს, არის სუსტი,“–განაცხადა მარგველაშვილმა.
მანანა ღოღობერიძე
