„ახალ პრეზიდენტს ფუნდამენტურ საკითხებზე ექნება თავსი ხედვა, თავისი პოლიტიკა. შეიძლება იყოს სივრცეები სადაც ორმხრივი თანამშრმლობისთვის მოხდება ნიადაგის მოსინჯვა, მაგრამ არავითარ შემთხევვაში საქართველოს ინტერესების საზიანოდ“. ამერიკის შეერთებული შტატების ახალი პრეზიდენტის არჩევის შემდეგ მოსალოდნელ ცვილებებზე საქართველოს ევროინტეგრაციის მინისტრმა და ამერიკის შეერთებულ შტატებში საქართველოს მომავალმა ელჩმა დავით ბაქრაძემ ტელეკომპანია „იმედზე“, გადაცემა „ქრონიკის“ ეთერში ისაუბრა.
„ჩვენ შეგვიძლია ვიმსჯელოთ ჩვენს მიმართ ამერიკის სახელმწიფო პოლიტიკის მიხედვით, ეს შეეხება ჩვენი ტერიტორიული მთლიანობის მხარდაჭერას, თავდაცვისუნარიანობის განმტკიცებას. ეს არის წითელი ხაზები, რომელიც საერთაშორისო სამართლის პრინციპებს ეფუძნება და არ შეიცვლება. ამერიკის შეერთებული შტატების მოსახლეობამ აირჩია რესპუბლიკელი პრეზიდენტი და ხმა მისცა ცვლილებებს. ამერიკის შეერთებული შტატების ახალი პრეზიდენტი საგარეო პოლიტიკის კუთხითაც გამოირჩეოდა თავისი განსხვავებული აქცენტებით. თუმცა ეს რა თქმა უნდა არ შეეხება იმ სტრატეგიული თანამშრომლობას, რაც საქართველოს აქვს ამერიკის შეერთებულ შტატებთან. ჩვენი 25 წლიანი ურთიერთობა და პარტნიორობა შეეხებოდა როგორც თავდაცვისა და უსაფრთხოების საკითხებს, ასევე არაღიარების პოლიტიკას, ეკონომიკურ კავშირებს, კულტურულ–ჰუმანიტარულ ურთიერთობებს.
კრიზისის დასრულება რუსეთსა და ამერიკის შეერთებულ შტატებს შორის ნებისმიერ შემთხვევაში პოზიტიური მოვლენაა, თუმცა წინ ვერ გავუსწრებთ მოვლენებს, უნდა დაველოდოთ იმ პოლიტიკას, პროგრამას, რომელიც პრეზიდენტ ტრამპისა და მისი ადმინისტრაციის მიერ გახდება ცნობილი. დონალდ ტრამპმა განაცხადა, რომ ის იქნება ამერიკის გამაერთიანებელი პოლიტიკის მატარებელი ადმინისტრაცია, საერთაშორისო დონეზე მეგობრების ძიების მოტივის მქონე საგარეო პოლიტიკს ადმინისტრაცია, ამ თვალსაზრისით რაიმე საფრთხეს არ უნდა ველოდეთ“–განაცხადა დავით ბაქრაძემ.
მანანა ღოღობერიძე