„პოლიტიკური ელიტა იმყოფება ღრმა კრიზისში. რაც არ უდნა გაერთიანებები შექმნან, ახლა ორი მკვდრისგან ერთი ცოცხალი აღარ გამოვა. აღარ გვინდა პოლიტიკაში სასაფლაოები, ჯობია გზა გაიხსნას და ახალგაზრდები წამოვიდნენ.თუ ამ ხალხმა ისევ მუჯლუგუნებით არ შემოუშვეს სივრცეში არავინ და ყველას ქოქოლა აყარეს, ბუნებრივია არაფერი მოხდება“. ამის შესახებ პოლიტიკის ექსპერტმა გია ხუხაშვილმა „რუსთავი 2“–ზე, გადაცემა „კურიერის“ ეთერში ისაუბრა.
„მიმაჩნია, რომ ეს პოლიტიკური ელიტა ცოტა ხნით თუ თავს გაგვანებებს კარგი იქნება. წავიდნენ პენსიაზე, მემუარები დწერონ, თუ რამე იციან ახალგაზრდებს გაუზიარონ, ცოტა ხნით სხვა საქმით დაკავდნენ რომ სივრცე გათავისუფლდეს. მათზე მოთხოვნილებ აპოლიტიკურ ბაზარზე აღარ არის. მათ ვერ მოახერხეს ქუჩაში დაგდებული ძალაუფლების ხელში აღება. დღეს არც ერთი პოლიტიკური ძალა არ პასუხობს იმ მოთხოვნებს, რომელიც აქვთ მესამე არჩევანის მოსურნე ადამიანებს. ყველა ბრენდი არის დაზიანებული, დაუზიანებელი ბრენდი ქართულ პოლიტიკაში აღარ არის. ასეთი დაბალი ლეგიტიმაციის ხელისუფლება საქართველოს არ ჰყოლია. ამერიკის შეერთებულ შტატებში იმიტომ არ მიდიან არჩევნებზე, რომ იქ სოციალური კეთილდღეობა საკმარისია. დალაგებული ქვეყანაა, სისტემა მუშაობს და იქ დემოკრატიას დიდი ტრადიციები აქვს.
ეს არის კანონზომიერი პროცესი. ერთის მხრივ ქართულმა ოცნებამ ყველაფერი გააკეთა იმისათვის, რომ ოპოზიციურ ფლანგზე „ნაციონალური მოძრაობისთვის“ მაქსიმალური კომფორტი შეექმნა ანუ მოესუფთავებინა ველი, ამ ორპოლუსიანი აგრესიული წინასაარჩევნო კამპანიიდან გამომდინარე, რომელიც მიმართული იყო არა „ნაციონალური მოძრაობის“, არამედ მესამე არჩევანის წინააღმდეგ. ორი პარტიის ჯამური რეიტინგი 40 %–ს არასდროს აცილებია და შესაბამისად მოთხოვნა იყო მესამე არჩევანზე. ამ ორპოლუსიანმა აგრესიულმა წინასაარჩევნო კამპანიამ 60% მოსახლეობის დატოვა არჩევანის გარეშე. „ნაციონალური მოძრაობა“ გაძლიერდა, ოპოზიციურ ფლანგზე ის არის უალტერნატივო. დანარჩენმა ოპოზიციურმა ელიტამ ვერაფრით ვერ შესთავაზა ამომრჩეველს რაიმე ნორმალური, ჯანსაღი არჩევანი და ფაქტობრივად თამაშგარეთ დარჩა“.
გია ხუხაშვილმა ეროვნული ვალუტის გაუფასურების მიზეზებზეც ისაუბრა.
„სანამ ეკონომიკის რეალური სექტორი არ გვექნება, ლარის კურსს არაფერი ეშველება. გრძელვადიანი ვალუტის შენარჩუნება ქვეყანას შეუძლია მაშინ, თუ მას აქვს რეალური სექტორი, ექსპორტ–იმპორტის სალდო მეტ–ნაკლებად ზომიერი უნდა იყოს. ჩვენი ეკონომიკა არის ინდაურის ეკონომიკა. ტურისტები ჩამოვიდნენ,ლარის კურსი გაჩერდა. ზაფხული დასრულდა, ტურისტები წავიდნენ და ლარის კურსიც იზრდება. 15 დეკემბერს ხალხი ამოიღებს შენახულ დოლარებს მუთაქებიდან, იყიდიან ინდაურს და ხელისუფლება თავის მიღწევად გამოაცხადებს ამას. 15 იანვრიდან ისევ დაიწყებს ლარი გაუფასურებას“.
მანანა ღოღობერიძე
