„თუ 2010 წლის ბოლოს დედაქალაქში გადაადგილდებოდა 200 ათასი მანქანა, დღეს გადაადგილდება 400 ათასი მანქანა. ჩვენ გვაქვს ქალაქის საცობებიდან განტვირთვის 5 პუნქტიანი გეგმა, რომლის მხოლოდ ერთი პუნქტია ინფრასტრუქტურა“. მომდევნო წლის ბიუჯეტზე, პრიორიტეტებზე და დაგეგმილ პროექტებზე თბილისის მერმა დავით ნარმანიამ ტელეკომპანია „GDS“–ზე, გადაცემა „2030“–ის ეთერში ისაუბრა.
„ბოლო ექვსი წლის განმავლობაში ავტომობილების რაოდენობა გაორმაგდა.მიუხედავად ამისა ჩვენი რესურსების პირობებში აქტიურად ვმუშაობთ იმისათვის, რომ ცალკულ მონაკვეთებზე განიმუხტოს მოძრაობა. იგეგმება ასევე მაღალსართულიანი ავტოპარკინგების მშენებლობა. სპეციალისტები 10 ადგილს სწავლობენ, სადაც შიძლება ავტომობილების პარკირება.
2017 წლის ბიუჯეტის პროექტზე მუშაობა და პოლიტიკური კონსულტაციები დასრულებულია. ყველა შევთანმხდით შემდეგი წლის სტრატეგიებზე და პრიორიტეტებზე. ჩვენი ამოცანა იყო, მცირე რესურსები, დაახლოებით 800 მილიონი ლარი ოპტიმალურად გაგვენაწილებინა. გვქონდა კონსულტაციები საკრებულოს უმრავლესობასთან. ბიუჯეტში განხილვის პროცესს უმცირესობის წარმომადგენლებიც დაესწრებიან. მომდევნო წელს ყველაზე პრიორიტეტული იქნება საბავშვო ბაღები. წელს დავიწყეთ 10 ახალი საბავშვო ბაღის მშენებლობა, რომელიც შემდეგ წელსაც გაგრძელდება. 7 უკვე დავამთავრეთ, კიდევ 13 ახალი ბაღის პროექტს ვამზადებთ.
უცვლელი პრიორიტეტი იქნება დედაქალაქის გამწვანება, არა მხოლოდ ხეების დარგვის თვალსაზრისით, არამედ ბაღების, სკევერების, პარკების განახლების და იქ არსებული მდგომარეობის გაუმჯობესების თვალსაზრისით. უცვლელი პრიორიტეტი იქნება ასევე მუნიციპალიტეტის ინფრასტრუქტურის მოდერნიზაცია და ტრანსპორტის მდგომარეობის გაუმჯობესება. მომდევნო წლისთვის დაახლოებით 10 მილიონი ლარით კიდევ ვამცირებთ ადმინისტრაციულ ხარჯებს. თუ ჩვენი წინამორბედების მმართველობის დროს საშუალოდ 3, ან 5 კორპუსი მაგრდებოდა წლის განმავლობაში, ჩვენ გასულ წელს მნიშვნელოვნად გავზარდეთ სახლების გამაგრების ტემპი, 45 მრავალსართულიანი სახლი გამაგრდა. ამ თვალსაზრისით ტემპი არც მომდევნო წელს იქნება დაბალი. გაგრძელდება დაბალსართულიანი სახლების გამაგრებაც. ჯამში ადგილობრივი გამგეობები მინიმუმ 200 საცხოვრებელი სახლის მშენებლობას აფინანსებს ბინათმესაკუთრეთა ამხანაგობების პროექტის ფარგლებში.მნიშვნელოვანია საჯარო ინფრასტრუქტურის მდგომარეობის გაუმჯობესება, მათ შორის საავტომობილო გზების მშენებლობა. გამოვყოფ „ვეფხი და მოყმის“ მიმდებარე ტერიტორიიდან ვაშლიჯვრის გზისკენ ასასვლელ პროექტს, რომელიც მოემსახურება ვაშლიჯვრის ტერიტორიაზე არსებული საცობების განტვირთვას.
ტრანსპორტი ჩვენი მომდევნო წლის ასევე უცვლელი პრიორიტეტია. ავტობუსების პროექტი ინტენსიურ ფაზაშია, პირველი ათი ავტობუსი უკვე ჩამოვიდა დედაქალაქში. მათი დამზადება პოლონეთის ქალაქ სტრახოვიცაში მიმდინარეობს, დეკემბერში კიდევ ველოდებით 40 ახალ ავტობუსს, იანვრის და თებერვლის ბოლოს დამატებითი პარტიები შემოვა. მომდევნო წლის მარტამდე სრულად 143 ავტობუსი გვეყოლება ჩამოყვანილი და შესაბამის ტრასებზე გავლენ. 143 ავტობუსი გრძელი დისტანციების და ფართო ქუჩებისთვის საკმარისია, შემდეგი ეტაპისთვის კი ავტობუსები იქნება განკუთვნილი ქალაქის ვიწრო ქუჩებისთვის, ისტორიული ნაწილებისთვის და ისინი შედარებით მცირე გაბარიტიანი იქნება. რაც შეეხება მეტროპოლიტენს, ვაგონების მოდერნიზაცია გაგრძელდება, მომდევნო წლის დაფინანსების ფარგლებში 30 ვაგონის მოდერნიზაციას მოვახერხებთ. მათ გაუხანგრძლივდებათ ექსპლუატაციის ვადა. საბურთალოს ტერიტორიაზე დამატებითი მეტროსადგურის გახსნაც ნავარაუდევია მომდევნო წლის გაზაფხულის ბოლოს.
ტაქსების მიმართულებით მსოფლიო სხვადასხვა ქალაქების გამოცდილება შევისწავლეთ. გვესმის, რომ ბევრი ადამიანისთვის ტაქსი არის მათი ოჯახის რჩენის ერთადერთი საშუალება, ამიტომ მკაცრ და ხისტ გადაწყვეტილებებს არ მივიღებთ,“–განაცხადა დავით ნარმანიამ.
მანანა ღოღობერიძე
