„ხელოვნურად ფიქსირებული კურსის მომენტალური გაშვებით მივიღეთ ასეთი კატასტროფული შედეგი,ეს შეკუმშული ზამბარის ეფექტია.ეს ყოველთვის დარჩება შავ ლაქად ეროვნული ბანკის ისტორიაში. ეს იყო პირველი ნიშანი, როდესაც ეროვნული ბანკი მთავრობის მორჩილი გახდა“. ლარის გაუფასურების შესაძლო მიზეზებზე და ხელისუფლების როლზე „ერთიანი ნაციონალური მოძრაობის“ წევრმა რომან გოცირიძემ „ტვ პირველზე“, გადაცემა „ინგა გრიგოლიას დღის ამბების“ ეთერში ისაუბრა.
„რეგულირების ეკონომიკის შედეგია გაუფასურებული ლარი,მთავრობის დანაშაულია დღეს არსებული მდგომარეობა. როდესაც ხდება კურსის ფიქსაცია, ეს არ ასახავს საბაზრო ვითარებას. ფიქსირებული კურსი ნიშნავს იმპორტის სტიმულირებას. როდესაც ლარი იყო მყარი, აგვისტოდან მოყოლებული არჩევნებამდე, ეროვნული ბანკი ინტერვენციებით ახალისებდა იმპორტს. ზაფხულში და შემოდგომაზე ლარი გაუფასურდებოდა, თუმცა არა იმ ხარისხით , როგორც დღეს. ის იქნებოდა მცოცავი გაუფასურების რეჟიმში, იქნებოდა მაქსიმუმ 2,4.
პრემიერ–მინისტრის განცხადება იყო არასწორი, როგორც ჩანს მას დამახინჯებული სტატისტიკა შეუტანეს. რეალობა აბსოლიტურად საწინააღმდეგო მონაცემებია.ლარის გაუფასურების მთავარი მიზეზი ის არის, რომ ქვეყნის ექსპორტი კლებულობს. ოქტომბერში წინა წლის ანალოგიურ პერიოდთან შედარებით ექსპორტი შემცირებულია 7 %–ით. ის, რომ თითქოს ლარის გაუფასურების მიზეზი არის იმპორტის ზრდა, ხალხს ფული გაუჩნდა და დაიწყეს უცხოური საქონლის შესყიდვა, სტატისტიკურადაც არასწორია. ასევე შემცირებულია იმპორტი წინა წლის პერიოდთან შედარებით. პრემიერ–მინისტრის მიერ გამოცხადებული მიზეზები არც ერთი არ აღმოჩნდა რეალური.
ქვეყნის მთავრობაში და პრემიერ–მინისტრის სტრუქტურებში არსებობს ეკონომიკური საბჭო, რომელიც დაცინვის ობიექტი იყო დიდი ხნის განმავლობაში, მას ჰყავს სიმბოლურად 41 ეკონომიკური მრჩეველი. მრჩევლებზე ჯოხის გადატეხვა არ არის სწორი, ეს არის მაგალითი, რომ ქვეყანაში საშინელი ბიუროკრატიაა, გაბერილია შტატები. ეკონომიკის სამინისტრო მკვდარი ორგანიზაციაა, მათი დაქვემდებარებული ორგანოები ავტონომიურადაც შეძლებენ საქმის გაკეთებას. ვიღაცას ჰგონია რომ ეკონომიკის სამინისტრო კარგად ჟღერს, არ არის ეს ორგანო, რომელსაც რამე ფუნქცია აქვს. ასევე მკვდარი ორგანიზაციაა ენერგეტიკის სამინისტრო, როცა ბიზნესი არის კერძო და მარეგულირებლები დამოუკიდებელი,“–განაცხადა რომან გოცირიძემ.
მანანა ღოღობერიძე
